მე ვარ ხელისუფლების ნაწილი, მაგრამ არ ვარ მთავრობა. სწორედ ჩემი ინიციატივა იყო, რომ მედიის ყველა წარმომადგენელი აქ შეგკრიბეთ, - ამის შესახებ საქართველოს პრეზიდენტმა, სალომე ზურაბიშვილმა განაცხადა, რითაც უპასუხა კითხვას იმის შესახებ, თუ როგორ შეიძლება ჩაერთოს პრეზიდენტი იმ კუთხით, რომ საზოგადოებიდან წამოსული ინიციატივების მთავარი გამტარი გახდეს მედია და ეს იყოს ეროვნული თანხმობის ერთ-ერთი ასპექტი.

როგორც მან აღნიშნა, საზოგადოების შეთანხმებას „გაზომვა“ არ სჭირდება.

„მიზანი სულ არ არის, რომ ხელოვნური ერთიანი სულისკვეთება გამოვავლინოთ. ჩვენ უნდა აღმოვაჩინოთ, რომ ქვეყანა ქვეყანა არ არის, თუ მას არ აქვს გარკვეულწილად ან ნაწილობრივ თავისი წარსულის ხედვა. მან უნდა იცოდეს, თუ რა იყო ეს წარსული. წარსულში ჩვენს კონფლიქტებზე იგივე მიდგომა არის საჭირო. თუ შევძლებთ საუბარს და ხელოვნური მოსაზრებებიდან გადასვლას უფრო რეალურზე, იქაც დაგვეხმარება ეროვნული თანხმობა.

ვიცი, რომ უკრაინის საკითხზე საზოგადოება არის შეჯერებული. მე ვერ გავაკეთებ დასკვნებს, უკრაინასთან დაკავშირებით ჩემი პოზიცია არის ძალიან ცნობილი. მინდა გავახსენო ბატონ ლავროვს, რომ როდესაც ჩვენ გვქონდა მოლაპარაკებები, მან გამოთქვა მოსაზრება, რომ ყველა ქვეყანას აქვს სრული თავისუფლება თავისი სუვერენიტეტიდან გამომდინარე აირჩიოს თავისი მოკავშირე და ალიანსები“, - განაცხადა სალომე ზურაბიშვილმა.