ბაკურიანში, მიტარბის საბაგიროდან დამსვენებელთა ევაკუაცია დასრულდა.

როგორც "ინტერპრესნიუსს" "მთის კურორტების განვითარების კომპანიიდან" აცნობეს, მაშველებმა საბაგიროდან 25 ადამიანი ჩამოიყვანეს.

"ძაბვის ვარდნის გამო მიტარბის საბაგირო დროებით გამოირთო. გამორთვის წუთიდან, ადგილზე მობილიზებული იყო სამაშველო სამსახურის ყველა თანამშრომელი, რომლებიც ახორციელებდნენ დამსვენებლების უსაფრთხო ჩამოყვანას საბაგიროდან.

სამაშველო ოპერაცია წარმატებით დასრულდა", - აღნიშნულია კომპანიის ინფორმაციაში.