პარტია "საქართველოსთვის" ინიციატივას “სახალხო ბიუჯეტირების“ თაობაზე “ქართული ოცნების“ დეპუტატებმა მხარი არ დაუჭირეს.
პარტიამ "საქართველოსთვის" “ადგილობრივი თვითმმართველობის კოდექსში“ ცვლილებების პროექტი საფინანსო-საბიუჯეტო კომიტეტის სხდომაზე წარადგინა.
საკანონმდებლო ინიციატივა ითვალისწინებს ადგილობრივი თვითმმართველობის განხორციელებაში მოქალაქეთა მონაწილეობის ფორმის შექმნას, ე.წ. სახალხო ბიუჯეტირების სახით.
პროექტის მიხედვით, მუნიციპალიტეტებში ბიუჯეტების ფორმირებისას მოსახლეობის ჩართვა სავალდებულო ხდება და მუნიციპალურ მთავრობებს ვალდებულება ეკისრებათ, ბიუჯეტის არანაკლებ 3%-ისა სწორედ მოქალაქეებთან წინასწარი შეხვედრებისა და მუშაობის შედეგად დაგეგმოს და დახარჯოს.
აღნიშნულ ცვლილებას “ქართული ოცნების“ არცერთმა დეპუტატმა მხარი არ დაუჭირა.
როგორც პარლამენტის საფინანსო-საბიუჯეტო კომიტეტის თავმჯდომარის პირველმა მოადგილემ პაატა კვიჟინაძემ განაცხადა, მთავრობის დადგენილებით სოფლის მხარდაჭერის პროგრამა არსებობს, რომელიც ადგილობრივი ბიუჯეტის ნაწილია და სწორედ მოსახლეობასთან შეთანხმებით იგეგმება. მისივე თქმით, კანონში არანაკლებ 3%-ის მითითება არასწორი მიდგომა იქნება.