პარლამენტის ჯანდაცვის კომიტეტის ფარგლებში თამბაქოს ნაწარმის სტანდარტიზებულ შეფუთვასთან დაკავშირებულ საკითხზე იმსჯელეს

პარლამენტის ჯანდაცვის კომიტეტის ფარგლებში თამბაქოს ნაწარმის სტანდარტიზებულ შეფუთვასთან დაკავშირებულ საკითხზე იმსჯელეს.

თამბაქოს ნაწარმის სტანდარტიზებული შეფუთვის გარეშე რეალიზაცია 2023 წლის პირველი იანვრიდან უნდა აიკრძალოს. სწორედ ამ მიზანს ემსახურება კანონქვემდებარე ნორმატიული აქტის - „საქართველოში სარეალიზაციოდ განკუთვნილი თამბაქოს ნაწარმისა და მისი შეფუთვის სტანდარტიზების შესახებ“ ტექნიკური რეგლამენტის პროექტი, რომლის თაობაზეც ჯანდაცვის მინისტრის მოადგილემ თამარ გაბუნიამ ისაუბრა.

საქმე ეხება თამბაქოს ნაწარმის მიმზიდველობის შემცირებას, სამედიცინო გაფრთხილების ეფექტიანობას და თვალსაჩინოების გაზრდას მომხმარებლის შეცდომაში შეყვანის შესაძლებლობების შემცირების მიზნით. შესაბამისად, როგორც აღინიშნა, აქცენტი კეთდება თამბაქოს ნაწარმისადმი მიმზიდველობის შემცირებაზე, თამბაქოს შეფუთვის საშუალებით თამბაქოს რეკლამირების და პოპულარიზაციის შემთხვევების აღმოფხვრაზე, მომხმარებელში იმგვარი შთაბეჭდილების შექმნის თავიდან არიდებაზე, თითქოს თამბაქოს რომელიმე პროდუქტი სხვა პროდუქტზე ნაკლებად მავნებელია და თამბაქოს ნაწარმის შეფუთვაზე დატანილი სამედიცინო გაფრთხილებების შემჩნევადობის, მისი ეფექტიანობის გაძლიერებაზე.

როგორც ჯანდაცვის კომიტეტის თავმჯდომარემ დიმიტრი ხუნდაძემ განაცხადა, თამბაქოსაგან გათავისუფლების პროცესი საქართველოში დაწყებულია და ამ პროცესს ვერავინ შეაჩერებს.

„ამის ლობისტი, რა თქმა უნდა, ჯანმრთელობის დაცვისა და სოციალურ საკითხთა კომიტეტი იქნება. მე ამის ხმამაღლა გაცხადების ოპტიმიზმს მაძლევს საზოგადოების ადეკვატური დამოკიდებულება, რომ საზოგადოების მიმღებლობა ამ კუთხით არის ძალიან მაღალი. ნაკლები მწეველი და მეტი ჯანმრთელი მოქალაქე - ეს იმ ქვეყნის აუცილებელი პირობაა, რომელსაც აქვს დემოგრაფიული პრობლემები და ჩვენ კიდევ უფრო მაღალ ხარისხში ვიყვანთ ვალდებულებას, რომ მოსახლეობის ჯანმრთელობა იყოს დაცული და თამბაქოს ზიანი იქნეს მაქსიმალურად შემცირებული“, - განაცხადა დიმიტრი ხუნდაძემ.

თამარ გაბუნიას განმარტებით, თამბაქოს ნაწარმის სტანდარტიზებული შეფუთვის გარეშე რეალიზაციის აკრძალვა სრულ შესაბამისობაშია თამბაქოს კონტროლის ჩარჩო კონვენციის მოთხოვნებთან, ასევე ასახულია 2021-2025 წლების თამბაქოს კონტროლის სახელმწიფო სტრატეგიასა და სამოქმედო გეგმაში. შემოთავაზებული პროექტი შესაბამისობაშია ევროკავშირის სამართლებრივ აქტებთან.

„მოლოდინი გვაქვს, რომ ამ ტიპის ცვლილებები გამოიწვევს მწეველობის მაჩვენებლების შემცირების ხელშეწყობას. ეს რა თქმა უნდა, თავის მხრივ დადებითად აისახება საზოგადოებრივი ჯანდაცვის იმ დიდ გამოწვევებზე, რომელიც ჩვენს წინაშე დგას“,- განაცხადა თამარ გაბუნიამ.

უკრაინაში შედგენილ სასანქციო სიაზე მომუშავე ჯგუფის წევრი სვეტლანა მუსიიაკა - სიაში დღეისთვის 19 ათასი ადამიანია, თუმცა ეს საწყისი ეტაპის სამუშაოა და სანქციებზე საბოლოო გადაწყვეტილება დამოკიდებული იქნება უსაფრთხოების საბჭოსა და შემდეგ უკვე პრეზიდენტზე
ქართული პრესის მიმოხილვა 29.09.2022
ვანო მაჭავარიანი -  თუ ხელისუფლებამ არ იაქტიურა, იყოს უკრაინა-მოლდოვა- საქართველოს სამეულის ნაწილი, ჩვენ აღმოვჩნდებით უკრაინა-მოლდოვას ევროპული და ატლანტიკური მომავლის მიღმა, რაც ქვეყნისთვის კატასტროფა იქნება
„ფარმადეპოში“ თურქული მედიკამენტების ასორტიმენტი გაიზარდა
ბაზისბანკის მხარდაჭერით, ფონდ "ნატვრის ხის" საქველმოქმედო კონცერტი გაიმართა
VISA-ს და „ბიბლუსის“ ერთობლივი შეთავაზება მომხმარებელს - 30%-იანი ფასდაკლება სრულ ასორტიმენტზე
კომპანია FINA-ს წარმატების ისტორია - 11 წელი ბაზარზე
ტერაბანკისა და სააგენტოს „აწარმოე საქართველოში“ ხელშეწყობით, კახეთში სასტუმრო „ისევ ყვარელი“ განახლდა