სპეციალური საგამოძიებო სამსახურის უფროსობის კანდიდატი - ყველა სისხლის სამართლის საქმეზე, სადაც სახელმწიფო ბრალდებას ვახორციელებდი ვიტყვი, რომ სახელმწიფოს ღირსეულად წარმოვადგენდი

ყველა სისხლის სამართლის საქმეზე, სადაც სახელმწიფო ბრალდებას ვახორციელებდი ვიტყვი, რომ სახელმწიფოს ღირსეულად წარმოვადგენდი, - ამის შესახებ სპეციალური საგამოძიებო სამსახურის უფროსის თანამდებობაზე ასარჩევად წარდგენილმა კანდიდატმა, ემზარ გაგნიძემ პარლამენტში, იურიდიულ საკითხთა კომიტეტის სხდომაზე განაცხადა.

როგორც გაგნიძემ აღნიშნა, მის წარმოებაში არსებულ არცერთ სისხლის სამართლის საქმეზე უხერხულობას არ გრძნობს.

„თქვენ კონკრეტული საქმე გააჟღერეთ, როგორც მოიხსენიებთ როგორც „ფარცხალაძის საქმეს“. ამ სისხლის სამართლის საქმეზე სახელმწიფო ბრალმდებელი არ ვყოფილვარ. ჩემი არცერთი მხარდაჭერილი ბრალდებიდან არათუ რაიმე უხერხულობის მომენტს ვგრძნობ, ნებისმიერ საქმეზე, რომელზეც გადაწყვეტილება მაქვს მიღებული და ვაწერ ხელს სისხლის სამართლებრივი დევნის კუთხით, ბრალდების შესახებ დადგენილებას, დღესაც ხვალაც და ზეგაც მზად ვარ ყველა გადაწყვეტილება დავასაბუთო. ყველა სისხლის სამართლის საქმეზე, სადაც სახელმწიფო ბრალდებას ვახორციელებდი, ვიტყვი რომ სახელმწიფოს ღირსეულად წარმოვადგენდი. მე ამ სისხლის სამართლის საქმეზე სახელმწიფო ბრალმდებელი არ ვყოფილვარ, მაგრამ საზოგადოების ინფორმირება ბრიფინგის გზით მე მოვახდინე, სპიკერი ვიყავი“, - მიმართა გაგნიძემ „ნაციონალური მოძრაობის“ წევრს, ხატია დეკანოიძეს, რომელიც მისგან ე.წ. ფარცხალაძე-თორდიას საქმის დეტალებით დაინტერესდა.

შეგახსენებთ, რომ პარლამენტის იურიდიულ საკითხთა კომიტეტი დღევანდელ სხდომაზე პრემიერ-მინისტრის მიერ სპეციალური საგამოძიებო სამსახურის უფროსის თანამდებობაზე ასარჩევად წარდგენილ კანდიდატებს უსმენენ. აღნიშნულ თანამდებობაზე ემზარ გაგნიძისა და კარლო კაციტაძის კანდიდატურებია წარდგენილი. სპეციალური საგამოძიებო სამსახური სახელმწიფო ინსპექტორის სამსახურის ლიკვიდაციის შედეგად შეიქმნა. ამავე სამსახურის ბაზაზე ჩამოყალიბდა პერსონალურ მონაცემთა დაცვის სამსახურიც, რომლის ხელმძღვანელის პოსტზე წარდგენილ კანდიდატებს ადამიანის უფლებათა დაცვის კომიტეტმა უკვე მოუსმინა. მათ პარლამენტი ხმათა უმრავლესობით 6 წლის ვადით აირჩევს.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს