საღამოს გვექნება უმრავლესობის სხდომა, სადაც ვიმსჯელებთ და მივიღებთ საბოლოო გადაწყვეტილებას, ახლა კომენტარის გაკეთება გამიჭირდება, - ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა, რითაც გამოეხმაურა კითხვას იმის შესახებ, თუ რა გადაწყვეტილებას მიიღებს მმართველი გუნდი ბადრი ჯაფარიძის, შალვა ნათელაშვილის და ელენე ხოშტარიას საპარლამენტო მანდატის შეჩერებასთან დაკავშირებით.

როგორც კობახიძემ აღნიშნა, აღნიშნული საკითხი დღეს, 14 თებერვალს, უმრავლესობის სხდომაზე გადაწყდება.

„დღეს 3 დეპუტატთან მიმართებით მესამედ განიხილება ასეთი საკითხი. საღამოს გვექნება უმრავლესობის სხდომა, სადაც ვიმსჯელებთ და მივიღებთ საბოლოო გადაწყვეტილებას. მანამდე რაღაც კომენტარის გაკეთება გაგვიჭირდება. უმრავლესობა საღამოს ამასთან დაკავშირებით საბოლოო გადაწყვეტილებას მიიღებს.

აქამდე, მიუხედავად იმისა, რომ ოპოზიციონერმა დეპუტატებმა დაწერეს შესაბამისი განცხადებები და აცდენდნენ სხდომებს, ჩვენ 2-ჯერ მივიღეთ გადაწყვეტილება 60 ოპოზიციონერი დეპუტატისთვის საპარლამენტო მანდატის შენარჩუნებასთან დაკავშირებით“, - განაცხადა ირაკლი კობახიძემ.