მიხეილ სააკაშვილთან დაკავშირებით დროებითი საგამოძიებო კომისიის შექმნის საკითხზე მომზადებული დადგენილების პროექტი პარლამენტის დღევანდელ სხდომაზე განსახილველად აღარ გავა.

საკითხი პარლამენტის სხდომის დღის წესრიგში ასახულია, თუმცა როგორც ფრაქცია „ნაციონალური მოძრაობის“ თავმჯდომარე ხატია დეკანოიძემ განმარტა, იმის გათვალისწინებით, რომ „ქართული ოცნების“ მხრიდან ადგილი აქვს წვრილმან თაღლითობასა და ქურდობას, რაც რამდენიმე ოპოზიციონერი დეპუტატისთვის მანდატის შეწყვეტის გადაწყვეტილებაში გამოიხატება, საგამოძიებო კომისიის შექმნის საკითხის მომდევნო კვირის პლენარულ სხდომაზე გადატანას მოითხოვენ.

„ჩვენ დანებებას არ ვაპირებთ. საუბარი გვექნება კოლეგებთან. დარწმუნებული ვარ, შეიქმნება არა მხოლოდ ეს კომისია, არამედ ყველა სხვა კომისია, რომელთა შექმნის ინიციატივა ოპოზიციას აქვს“, - აღნიშნა ხატია დეკანოიძემ.