პარლამენტის პლენარულ სხდომაზე რამდენიმე დეპუტატისთვის სადეპუტატო უფლებამოსილების შეწყვეტის საკითხის განხილვა დაიწყო.

დღის წესრიგში ოთხი დეპუტატისთვის: - კახა კუჭავასთვის, ელენე ხოშტარიასთვის, შალვა ნათელაშვილისა და ბადრი ჯაფარიძისთვის სადეპუტატო უფლებამოსილების ვადამდე შეწყვეტის საკითხი დგას.

პარლამენტი საპროცედურო საკითხთა და წესების კომიტეტის თავმჯდომარე ირაკლი ქადაგიშვილი აღნიშნულ საკითხზე პარლამენტს კომიტეტის დასკვნას აცნობს. დასკვნის თანახმად, მათ მანდატი უნდა შეუწყდეთ.

პარლამენტის ყოფილი თავმჯდომარე კახა კუჭავა პარლამენტიდან პირადი განცხადებით მიდის.

ელენე ხოშტარიასთვის და შალვა ნათელაშვილისთვის მანდატების შეწყვეტას მათ მიერ პლენარული სხდომების არასაპატიო მიზეზით გაცდენა იწვევს.

რაც შეეხება “ლელოს“ ლიდერის, ბადრი ჯაფარიძისთვის მანდატის შეწყვეტის საკითხს, ამის ფორმალურ-სამართლებრივ საფუძველს მის წინააღმდეგ თბილისის საქალაქო სასამართლოს მიერ გამოტანილი გამამტყუნებელი განაჩენი წარმოადგენს.