ნატო-ს გენერალური მდივანი, იენს სტოლტენბერგი აცხადებს, რომ რეალური დეესკალაცია ნიშნავს რუსული ჯარების და სამხედრო ტექნიკის არსებით გაყვანას უკრაინის მოსაზღვრე ტერიტორიებიდან.

„რუსეთმა შეკრიბა საბრძოლო ძალა უკრაინასა და მის გარშემო, რაც უპრეცედენტოა ცივი ომის შემდეგ. ახლა ყველაფერი მზად არის ახალი თავდასხმისთვის“ , - აღნიშნა სტოლტენბერგმა.

მისი თქმით, რუსეთს ჯერ კიდევ აქვს დრო უკან დაიხიოს და ომისთვის მზადება შეწყვიტოს.

„რუსეთს ჯერ კიდევ აქვს დრო, რომ უკან დაიხიოს, შეწყვიტოს ომისთვის მზადება და დაიწყოს მუშაობა მშვიდობიანი გადაწყვეტისთვის“, - აღნიშნა ალიანსის ხელმძღვანელმა.

მისი თქმით, რუსეთის მხრიდან დეესკალაციის ნიშნები არ ჩანს.

„მოსკოვიდან არის ნიშნები, რომ დიპლომატია უნდა გაგრძელდეს. ეს იძლევა ფრთხილი ოპტიმიზმის საფუძველს. მაგრამ ჯერჯერობით რუსეთის მხრიდან ადგილზე დეესკალაციის რაიმე ნიშანი არ გვინახავს“, - აღნიშნა სტოლტენბერგმა.