თბილისის საქალაქო სასამართლოში ოპოზიციონერი ლიდერის, გიგი უგულავას ბრალდების სისხლის სამართლის საქმეზე, რომელიც თბილისის საერთაშორისო აეროპორტში მომხდარ ინციდენტს უკავშირდება, სასამართლო პროცესი მიმდინარეობს.

სხდომას არ ესწრება თავად ბრალდებული გიგი უგულავა.

დღევანდელ სასამართლო პროცესზე ბრალდების მხარის მოწმეებს დაკითხავენ. კერძოდ, ამ წუთებში ძიუდოისტ ბადრი გავაშელიშვილის მეგობარს, მსჯავრდებულ დავით პარკაძეს კითხავენ.

ცნობისთვის, შემთხვევა თბილისის აეროპორტში 2019 წლის 11 დეკემბერს მოხდა. გიგი უგულავას ბრალი სისხლის სამართლის კოდექსის 126-ე მუხლით აქვს წარდგენილი, რაც ძალადობას გულისხმობს. მას ძიუდოისტ ბადრი გავაშელიშვილის ცემას ედავებიან. გიგი უგულავასთან ერთად ბრალდებული გახლდათ გავაშელიშვილის მეგობარი დავით პარკაძე, რომელსაც პოლიტიკოს გოკა გაბაშვილის ცემას ედავებოდნენ. სასამართლოს გადაწყვეტილებით, ის დამნაშავედ იქნა ცნობილი და ჯარიმა დაეკისრა.