„ნაციონალური მოძრაობის“ წევრის, დავით კირკიტაძის განცხადებით, პროცესები, რომლებიც მიხეილ სააკაშვილის წინააღმდეგ მიმდინარეობს, არის მთლიანად პოლიტიკური. მისი თქმით, 7 ნოემბერი იყო „ნაციონალური მოძრაობის” ხელისუფლების ერთ-ერთი ყველაზე დიდი შეცდომა, რომელზეც მიხეილ სააკაშვილმა პოლიტიკური პასუხისმგებლობა აიღო.
„20 ივნისის შემდეგ არა თუ ვინმე დაისაჯა, არამედ ეს ადამიანები დაწინაურდნენ. არ გვაქვს ილუზია, რომ საქალაქო სასამართლო მიიღებს რაიმე სახის სამართლებრივ გადაწყვეტილებას. იშვიათი მოსამართლეების გარდა, გადაქცეულები არიან „ოცნების” პოლიტიკური დავალებების შემსრულებლებლად. ეს არის პოლიტიკური ანგარიშსწორება და „ოცნების” დაუოკებელი სურვილი, რომ შეინარჩუნოს ძალაუფლება”, - აღნიშნა დავით კირკიტაძემ.
აღნიშნული განცხადება დავით კირკიტაძემ საქალაქო სასამართლოსთან გააკეთა, სადაც მიხეილ სააკაშვილის მხარდამჭერი აქცია მიმდინარეობს. თბილისის საქალაქო სასამართლოს ეზოში ,,ნაციონალური მოძრაობის” წევრები და მხარდამჭერები შეიკრიბნენ. აქციაზე შეკრებილებს ხელში საქართველოს დროშები და დროშები წარწერით ,,თავისუფლება მიშას” უჭირავთ. ამასთან, აქტივისტებმა სასამართლოს ეზოში ტრაფარეტები მიიტანეს, რომელზეც მიხეილ სააკაშვილის ეკონომიკური გეგმის პუნქტებია დატანილი.
პარალელურად, თბილისის საქალაქო სასამართლოში 7 ნოემბრის საქმეზე საქართველოს ყოფილი პრეზიდენტის, მიხეილ სააკაშვილის სასამართლო პროცესი მიმდინარეობს.