ამერიკის შეერთებული შტატების საელჩო სავიზო თაღლითობის წინააღმდეგ ბრძოლაში საქართველოს პოლიციის მხრიდან გამორჩეულ თანამშრომლობას აფასებს და აცხადებს, რომ თბილისის პოლიციის დეპარტამენტის მიერ გასულ კვირას თაღლითობაში ეჭვმიტანილი პიროვნების დაკავება აშშ-ის საელჩოსა და საქართველოს სამართალდამცავ ორგანოებთან ახლო თანამშრომლობის მაგალითია.
ამის შესახებ ამერიკის შეერთებული შტატების საელჩო განცხადებას ავრცელებს.
„გასულ კვირას თბილისის პოლიციის დეპარტამენტმა დააკავა თაღლითობაში ეჭვმიტანილი პიროვნება, რომელზეც მიმდინარეობდა გამოძიება, სავარაუდოდ, საქართველოს ორი მოქალაქისთვის ფულის სანაცვლოდ ვიზების აღებაში დახმარების გამო. ეს საქმე აშშ-ის საელჩოსა და საქართველოს სამართალდამცავ ორგანოებთან ახლო თანამშრომლობის კიდევ ერთი მაგალითია და წარმოაჩენს საქართველოს შესაძლებლობებს სავარაუდო ყალბი დოკუმენტაციის გამოძიებაში.
აშშ-ის საელჩო შეახსენებს პოტენციურ აპლიკანტებს, რომ მსგავსი ტიპის მოვაჭრეებს არ აქვთ სავიზო პროცესში დახმარების უნარი. ვიზისა და დოკუმენტაციის გაყალბება დანაშაულია, რომელსაც აშშ-სა და საქართველოს ხელისუფლება ძალიან სერიოზულად ეკიდება“,- ნათქვამია აშშ-ის საელჩოს განცხადებაში.
ცნობისთვის, გასულ კვირას შინაგან საქმეთა სამინისტროს თბილისის პოლიციის დეპარტამენტის გლდანი-ნაძალადევის მთავარმა სამმართველოს თანამშრომლებმა ამერიკის შეერთებული შტატების საელჩოსთან აქტიური თანამშრომლობით, თაღლითობის ბრალდებით ერთი პირი დააკავეს, რომელიც საქართველოს ორ მოქალაქეს გარკვეული თანხის გადახდის სანაცვლოდ, ამერიკის შეერთებულ შტატებში გასამგზავრებელი ბილეთების შეძენას, აშშ-ში საცხოვრებლით, სამსახურით უზრუნველყოფასა და სამუშაო ვიზების დამზადებას დაჰპირდა, თუმცა შეთანხმება არ შეასრულა.