გრძელვადიან პერსპექტივაში რუსეთმა საკუთარ თავს საკმაოდ სერიოზული პრობლემები შეუქმნა, რადგან ასეთი სახის ოკუპაცია დიდი რესურსის მობილიზებას საჭიროებს, - ამის შესახებ პარლამენტის პირველმა ვიცე-სპიკერმა გია ვოლსკიმ, რუსეთის ფედერაციის მიერ ოკუპირებული ლუგანსკისა და დონეცკის რეგიონების დამოუკიდებლობის აღიარებაზე საუბრისას განაცხადა.

მისი თქმით, სიტუაცია საკმაოდ მძიმე და სერიოზულია, ხოლო რუსეთს დასავლეთთან დაპირისპირება სერიოზულ დარტყმებს მიაყენებს როგორც პოლიტიკური, ასევე ეკონომიკური და უსაფრთხოების თვალსაზრისით.

„როგორც ჩანს, ამ ეტაპზე რუსეთმა ჩათვალა, რომ მისთვის აუცილებელი იყო ასეთი უკანონო ნაბიჯების გადადგმა. ეს არის სერიოზული, მსოფლიო, გლობალური დაპირისპირება - ასეთ ვითარებას შეიძლება ომი დავარქვათ. ცხელი წერტილები არსებობს, მაგრამ იმდენი არ არის, რომ მას ცხელ ფაზაში გადასული დაპირისპირება ვუწოდოთ. საქართველოსთვის საგანგებოდ მნიშვნელოვანია საკუთარი პოლიტიკით ქვეყნის უსაფრთხოებისა და სტაბილურობის შენარჩუნება უზრუნველყოს. ამავე დროს უკრაინისთვის მხარდაჭერა, ეს არის ჩვენი ინტერესებიდან გამომდინარე - ეს არ უნდა იყოს შიდა პოლიტიკური კეკლუცობისთვის გამოსაყენებელი თემა, როგორც ამას ჩვენი ოპონენტები აკეთებენ“. - განაცხადა გია ვოლსკიმ.