„მთავარი არხის" ერთ-ერთი დამფუძნებლის ნიკა გვარამიას, კახაბერ დამენიასა და ზურაბ იაშვილის ბრალდების სისხლის სამართლის საქმე დასკვნით ეტაპზეა.

დღევანდელ სასამართლო პროცესზე პროკურატურა დასკვნით სიტყვას წარმოთქვამს, დაცვის მხარე კი დასკვნით სიტყვას მომდევნო სხდომაზე წარმოთქვამს, რის შემდეგაც მოსამართლე განაჩენის გამოსატანად გავა.

პროცესს ორი ბრალდებული ესწრება, ნიკა გვარამია კი სხდომაზე არ იმყოფება.

პროკურატურა საკუთარ დასკვნით სიტყვაში აცხადებს, რომ აღნიშნულ საქმეზე არაერთი დამაჯერებელი მტკიცებულება აქვს წარმოდგენილი, რითაც, ბრალდებულების მხრიდან ფინანსური დანაშაულის ჩადენა დასტურდება.

საქმის პროკურორის ზვიად გუბელაძის განმარტებით, აღნიშნული ფინანსური დანაშაულის შედეგად "რუსთავი 2"-ს 7 მილიონ ლარაზე მეტი ზიანი მიადგა.

შეგახსენებთ, გენერალურმა პროკურატურამ 2020 წლის 6 სექტემბერს, „რუსთავი 2“-ის საქმეზე ბრალი ნიკა გვარამიას, ასევე „რუსთავი 2“-ის ყოფილ ფინანსურ დირექტორს კახა დამენიასა და „ინტერ მედია პლიუსის“ დირექტორს ზურაბ იაშვილს წაუყენა. ნიკა გვარამიას ბრალად ედება წინასწარი შეთანხმებით ჯგუფის მიერ, დიდი ოდენობით „რუსთავი 2“-ის კუთვნილი ქონებრივი უფლების გაფლანგვა, კომერციული მოსყიდვა და ყალბი ოფიციალური დოკუმენტის დამზადება, უკანონო შემოსავლის ლეგალიზაცია. ნიკა გვარამიას ასევე ბრალი ედება სამსახურეობრივი უფლებამოსილების ბოროტად გამოყენებაში. გვარამიას აღკვეთის ღონისძიების სახით 40 000-ლარიანი გირაო შეეფარდა, ამასთან, მას ქვეყნიდან გასვლის უფლება შეეზღუდა. კახა დამენიას გამოძიება სამაუწყებლო კომპანია „რუსთავი 2“-ის კუთვნილი ქონებრივი უფლების დიდი ოდენობით მართლსაწინააღმდეგო გაფლანგვაში ედება, რაც ჩადენილი იქნა წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით. დამენიას აღკვეთის ღონისძიების სახით 50 000-ლარიანი გირაო შეეფარდა. მას ასევე, აეკრძალა სახელმწიფო საზღვრის დატოვება საგამოძიებო ორგანოს ინფორმირებისა და თანხმობის გარეშე. რაც შეეხება ზურაბ იაშვილს, მას ბრალი ედება კომერციულ მოსყიდვასა და ყალბი ოფიციალური დოკუმენტის დამზადებაში. იაშვილს აღკვეთის ღონისძიების სახით 50 000-ლარიანი გირაო აქვს შეფარდებული.