უკრაინის ელჩი - ქართველები და საქართველოს მთავრობა ყველაფერს აკეთებს იმისთვის, რომ ჩვენს მოქალაქეებს დახმარება გაუწიოს
საქართველოში უკრაინის ელჩის იგორ დოლგოვის განცხადებით, უკრაინა საქართველოს მხარდაჭერისთვის მადლიერია.
როგორც დოლგოვმა საელჩოში გამართულ პრესკონფერენციაზე განაცხადა, საქართველოს მოქალაქეები და მთავრობა ყველაფერს აკეთებენ, რათა საქართველოში ჩარჩენილ უკრაინის მოქალაქეებს დაეხმარონ.
„ჩვენ მადლიერი ვართ ყველანაირი დახმარებისთვის და საქართველოშიც დიდ მხარდაჭერას ვგრძნობთ. იმის გამო, რომ ავიამიმოსვლა არ გვაქვს უკრაინასთან, ასეულობით უკრაინის მოქალაქე ჩარჩა საქართველოში. ქართველები და საქართველოს მთავრობა ყველაფერს აკეთებს იმისთვის, რომ ჩვენს მოქალაქეებს დახმარება გაუწიოს. საქართველოს მთავრობამ ცხელი ხაზი გახსნა უკრაინის მოქალაქეებისთვის და ყველაფერს აკეთებს, რათა ჩვენი მოქალაქეები უფასოდ განათავსოს. მცირე და მსხვილი სასტუმროების მეპატროენეები გვირეკავენ და გვეკითხებიან - რა შეიძლება გავაკეთოთ თქვენი მოქალაქეებისთვის“,- განაცხადა იგორ დოლგოვმა.
