უკრაინული დელეგაცია რუსეთთან მოლაპარაკებებზე გაემგზავრა. ამის შესახებ უკრაინის პრეზიდენტის მრჩეველმა მიხაილო პოდოლიაკმა განაცხადა.

მან სოციალურ ქსელ „ტვიტერში“ მისი და ფრაქცია“ხალხის მსახურის“ თავმჯდომარის დავით არახამიას ფოტო გამოაქვეყნა წარწერით: გზად რუსეთის ფედერაციასთან მოლაპარაკებებზე, უკვე ვერტმფრენში.

დავით არახამიას განცხადებით, მოლაპარაკებები კიევის დროით 16:00 საათზე დაიწყება. მისი თქმით, უკრაინული მხარე რუსეთისგან სულ მცირე ჰუმანიტარული კორიდორების გახსნას მოითხოვს. „ვიწყებთ ორ საათში. პროგრამა მინიმუმი- ჰუმანიტარული დერეფნებია. შემდეგ - ვითარებიდან გამომდინარე,“- განაცხადა არახამიამ.

ცნობისთვის, უკრაინასა და რუსეთს შორის მოლაპარაკებების დრო და ადგილი რამდენჯერმე შეიცვალა.

რუსეთის დელეგაციის ხელმძღვანელის ვლადიმირ მედინსკის ინფორმაციით, შეხვედრა ბელარუსში, ბრესტის ოლქში გაიმართება.