სამთო გამყოლთა ასოციაციების საერთაშორისო ფედერაციამ რუსეთს წევრობა შეუჩერა. ამის შესახებ საქართველოს სამთო გამყოლთა ორგანიზაციებმა საქართველოში უკრაინის საელჩოსთან ერთობლივი განცხადება გააკეთეს.

როგორც ორგანიზაციის წარმომადგენლები აცხადებენ, ისინი რუსეთის ფედერაციის ტურისტების მომსახურებას წყვეტენ და მიმართავენ რუს გამყოლებს, არ ჩამოვიდნენ საქართველოში და ვლადიმერ პუტინი შეაჩერონ.

“ქართველი გამყოლები ვდგავართ უკრაინასთან. რუს ტურისტებს არ მოვემსახურებით. რუს გამყოლებს ვეუბნებით - არ ჩამოხვიდეთ, ახლა ტურიზმის დრო არ არის; დარჩით, გააჩერეთ პუტინი ამ ბარბაროსობისგან. ჩვენ გუშინ მივმართეთ საერთაშორისო ფედერაციას და შეაჩერეს რუსეთის წევრობა. ასევე, შევთანხმდით, რომ ვითანამშრომლებთ სამთო გამყოლობის ასოციაციასთან და დავიწყებთ უკრაინელი გამყოლების მომზადებას უკრაინაში”,- განაცხადა სამთო გამყოლთა ასოციაციის წარმომადგენელმა დავით რაქვიაშვილმა.