აშშ-ის სახელმწიფო მდივანი ენტონი ბლინკენი მოუწოდებს რუსეთს, ნება დართოს უკრაინელებს, დატოვონ ქალაქები, რომლებსაც რუსული ჯარები ,,დაუნდობლად ბომბავენ“.

ამის შესახებ სახელმწიფო მდივანმა დიდი ბრიტანეთის საგარეო საქმეთა მინისტრთან ლიზ ტრასთან გამართული შეხვედრის შემდეგ ერთობლივ პრესკონფერენციაზე ისაუბრა.

„რუსეთი უსაფუძვლოდ შეიჭრა უკრაინაში“, - აღნიშნა ბლინკენმა და დასძინა, რომ რუსულმა მხარემ პატივი უნდა სცეს ჰუმანიტარულ დერეფნებს, რომლებიც ხალხს ალყაში მოქცეული ქალაქებისგან თავის დაღწევის საშუალებას აძლევს.

ლიზ ტრასის განცხადებით კი, სამშობიაროზე თავდასხმა ,,აბსოლუტურად საძულველი“ ქმედებაა.

„ჩვენ არ უნდა მოვისვენოთ მანამ, სანამ პუტინი უკრაინაში არ დამარცხდება და ქვეყნის სუვერენიტეტი არ აღდგება“, - აღნიშნა ტრასმა.