თეთრი სახლი დიდ მნიშვნელობას არ ანიჭებს რუსეთის საგარეო საქმეთა მინისტრის სერგეი ლავროვის მუქარას უკრაინაში მიმავალი მატერიალური დახმარების მიმართ. ამის შესახებ CNN-ი წერს.

თეთრი სახლის პრესსპიკერმა ჯენ ფსაკიმ რუსეთის საგარეო საქმეთა მინისტრის სერგეი ლავროვის განცხადებასთან დაკავშირებით, რომლის თანახმადაც, ნებისმიერი იარაღის გადაზიდვა უკრაინაში, რუსეთის "ლეგიტიმური" სამიზნე იქნება, განაცხადა, რომ მსგავსი მუქარა ადრეც ყოფილა.

„ეს არის მუქარა, რომელიც მან ადრეც გააკეთა“, - განაცხადა თეთრი სახლის პრესმდივანმა პრესკონფერენციაზე და დასძინა, რომ „ამერიკის ჯარები არ მოქმედებენ უკრაინის შიგნით“.

ფსაკის თქმით, აშშ ყურადღებით აკვირდება რუსეთის ესკალაციურ მოქმედებებს.

შეგახსენებთ, რუსეთის საგარეო საქმეთა მინისტრი სერგეი ლავროვი აცხადებს, რომ რუსი სამხედროები უკრაინისთვის იარაღის ნებისმიერ გადაზიდვას სამიზნედ აღიქვამენ.

„ჩვენ ძალიან მკაფიოდ განვაცხადეთ, რომ ნებისმიერი ტვირთი, რომელიც შევა უკრაინის ტერიტორიაზე, რომელიც მიგვაჩნია იარაღის გადამზიდად, გახდება ლეგიტიმური სამიზნე. ეს სრულიად გასაგებია“, - განაცხადა მან.

მან ასევე ხაზგასმით აღნიშნა, რომ მოსკოვი კიევისთვის S-300 საზენიტო-სარაკეტო სისტემების სხვა ქვეყნიდან მიწოდებას არ დაუშვებს.