თინა ბოკუჩავა - ნიკოლოზ სამხარაძემ შეცდომაში შეიყვანა საზოგადოება, როცა პოლონეთის საგარეო საქმეთა მინისტრს ციტირებდა

ნიკოლოზ სამხარაძემ შეცდომაში შეიყვანა საზოგადოება, როცა პოლონეთის საგარეო საქმეთა მინისტრს ციტირებდა, - ამის შესახებ "ნაციონალური მოძრაობის" დეპუტატმა თინა ბოკუჩავამ ჟურნალისტებთან განაცხადა.

ბოკუჩავამ დაადასტურა, რომ პოლონეთის საგარეო საქმეთა მინისტრთან შეხვედრისას, მან მიხეილ სააკაშვილის საკითხი დასვა. როგორც დეპუტატი განმარტავს, პოლონეთის როლი მომავალშიც იქნება ისეთივე მნიშვნელოვანი, როგორიც იყო აქამდე ყველა გამოწვევასთან მიმართებით, რაც ქვეყანას უდგას, მათ შორის, სააკაშვილთან დაკავშირებულ საკითხშიც.

"ნიკოლოზ სამხარაძეს მინდა შევახსენო, დიპლომატიური პროტოკოლის უმარტივესი წესია, რომ დახურული შეხვედრის ზოგადი შინაარსის გარდა, კონკრეტულ დეტალებზე საუბარი არასდროს დაშვებული არ არის. მესმის, რომ საზოგადოებრივი ინტერესი ძალიან მაღალია, მაგრამ დიპლომატიური პროტოკოლის გათვალისწინებით, შეხვედრის დეტალებზე ვერ ვისაუბრებ, მაგრამ ვინაიდან, “ქართულმა ოცნებამ” დაადასტურა, გეტყვით, რომ დიახ, პრეზიდენტ სააკაშვილის საკითხი დავსვი, რადგან ეს არის ქვეყნისთვის უდიდესი გამოწვევა და ახლა არის მომენტი, როცა პოლიტიკური ძალები უნდა ახდენდნენ კონსოლიდაციას, სხვათა შორის ამისკენ მოგვიწოდებს თავად პრეზიდენტი სააკაშვილიც, რათა სწორად გავუმკლავდეთ სერიოზულ საგარეო გამოწვევებს. პოლონეთის საგარეო საქმეთა მინისტრის ვიზიტამდე განხორციელდა ასევე პოლონეთის პრემიერისა და პრეზიდენტის ვიზიტები, რაც კიდევ ერთხელ ხაზს უსვამს იმას, რომ პოლონეთს კარგად ესმის, რამდენად სერიოზული გამოწვევის წინაშე დგას საქართველო. სამწუხაროდ, არ არის მხოლოდ გარე გამოწვევა რუსეთის მხრიდან, შიდა გამოწვევის წინაშეც ვდგავართ - ეს არის ჩვენი დემოკრატიული ინსტიტუტების დასუსტება, სასამართლოს სისტემის გამოყენება პოლიტიკური მიზნებისთვის, რომლის ყველაზე ნათელი მაგალითი პრეზიდენტი სააკაშვილის საკითხია. პოლონეთის საგარეო საქმეთა მინისტრის და ეუთო-ს თავმჯდომარის ნაცვლად, დეტალებზე, რომელზეც მან ისაუბრა, პრინციპულად არ ვისაუბრებ, ეს არასდროს გამიკეთებია", - განაცხადა ბოკუჩავამ.

ცნობისთვის, პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა, რომ პოლონეთის საგარეო საქმეთა მინისტრ ზბიგნევ რაუსთან შეხვედრაზე მიხეილ სააკაშვილის საკითხი „ნაციონალური მოძრაობის” წევრმა თინა ბოკუჩავამ დასვა.

„პასუხი იყო, რომ მიხეილ სააკაშვილის შესახებ გადაწყვეტილებები საქართველოში სასამართლომ უნდა მიიღოს და ეს ყველაფერი ქართული კანონმდებლობით უნდა მოხდეს“, - აღნიშნა ნიკოლოზ სამხარაძემ.

თენგიზ ფხალაძე - დღეს თამაშის დრო ნამდვილად არ არის, 12-ვე ვალდებულება უნდა შესრულდეს და არა შესრულების ილუზია შეიქმნას, კანდიდატობის ვერ მიღება მხოლოდ ჩვენს თავს უნდა დავაბრალოთ და სხვას არავის
ქართული პრესის მიმოხილვა 27.06.2022
უკრაინის დამოუკიდებელი ანტიკორუფციული კომისიის აღმასრულებელი დირექტორი - დრო ჩვენთვის სიცოცხლით იზომება, ჩვენ არც თუ ისე ტოლერანტულები ვართ ლოდინისადმი - ამ დროში ვკარგავთ ქვეყანას, რომელსაც რუსეთი წამებით კლავს
„სილქ როუდ ჯგუფი“ ბიზნესმენ ლევან კაჭარავას გარდაცვალებას ეხმაურება
პირველი კრიპტო POS-ტერმინალი საქართველოშია