პარტია „ევროპელი დემოკრატების“ თავმჯდომარის, პაატა დავითაიას განაცხადებით, რუსეთი იმპერიულ სახეს არ იცვლის და საქართველოს ოკუპირებული ტერიტორიების ანექსიას ამზადებს.
დავითაიას თქმით, ანატოლი ბიბილოვის განცხადება, სადაც ის ხაზს უსვამს, რომ უახლოეს პერიოდში დაიწყებს „სამართლებრივი ნაბიჯების“ გადადგმას და მოხდება ე. წ. სამხრეთ ოსეთის რესპუბლიკის რუსეთის ფედერაციაში გაერთიანება, საგანგაშოა.
„მას შემდეგ, რაც რუსეთმა უკრაინაში სამხედრო მიზანს ვერ მიაღწია, თავისი მარცხის ნაწილობრივ გადასაფარად, ახალი ტერიტორიების „შემოერთების“ მიზნით იმ პროვოკაციული გეგმის შესრულება დაიწყო, რაზედაც რუსეთის ფედერაცია დიდი ხანია მუშაობს. საქართველოს ხელისუფლების მიერ მაქსიმალურად სწრაფად უნდა მოხდეს რეაგირება და გაკეთდეს მკვეთრი მესიჯი, რომ არ დავუშვებთ ჩვენი ტერიტორიების ანექსიას. ბიბილოვის პროვოკაციული განცხადების შესახებ საქმის კურსში უნდა ჩავაყენოთ ჩვენი პარტნიორები. სამართალდამცავი სტრუქტურების მიერ უნდა გაიცეს სანქცია ე. წ. სამხრეთ ოსეთის პრეზიდენტზე, რომ მან, როგორც ძებნილმა და დამნაშავემ, რომელიც არღვევს საქართველოს კონსტიტუციურ წყობას, ვერ მოაწეროს ხელი დაგეგმილ ანექსიაზე. ეს იქნება სამართლებრივი საფუძველი, თუ როგორ თანამშრომლობს რუსეთის ფედერაცია კრიმინალებთან, რომელიც გამოყენებული იქნება როგორც კიდევ ერთი მტკიცებულება, რუსეთის ფედერაციის წინააღმდეგ ჰააგის სისხლის სამართლის საერთაშორისო სასამართლოში", - აცხადებს პაატა დავითაია.