აშშ-ში საქართველოს საელჩო ერთ-ერთი ყველაზე მნიშვნელოვანი საელჩოა - მნიშვნელოვანია, აშშ-ში საქართველოს ელჩი იყოს არა მხოლოდ დიდი დიპლომატიური გამოცდილების მქონე ადამიანი, არამედ ასევე პოლიტიკური გამოცდილების მქონე პირი, - ასე ეხმაურება საგარეო საქმეთა მინისტრის დავით ზალკალიანის აშშ-ში ელჩად დანიშვნის თაობაზე მიღებულ გადაწყვეტილებას პარლამენტის თავმჯდომარე შალვა პაპუაშვილი.
როგორც პაპუაშვილმა ჟურნალისტებთან საუბრისას განაცხადა, აშშ-ი საქართველოს უპირველესი სტრატეგიული პარტნიორია, ხოლო აშშ-ი საქართველოს საელჩო ერთ-ერთი ყველაზე მნიშვნელოვანი.
“დავით ზალკალიანი მრავალი წლის გამოცდილების მქონე დიპლომატია. როგორც მოგეხსენებათ, საგარეო საქმეთა სამინისტრო დიპლომატების სამინისტროა. მათ შორის მინისტრის პოზიცია სწორედ ამას გულისხმობს.
როდესაც პრემიერ-მინისტრი გადაწყვეტილებას იღებდა, ვვარაუდობ, რომ სწორედ ის იყო კრიტერიუმი, რომ აშშ-ში ძლიერი დიპლომატი გვყოლოდა, რათა უსაფრთხოების რთული მდგომარეობიდან გამომდინარე იყოს ძლიერი საელჩო, ძლიერი ელჩით სათავეში. გადაწყვეტილება აბსოლუტურად სწორია“, - განაცხადა შალვა პაპუაშვილმა.
რაც შეეხება საგარეო საქმეთა ახალ მინისტრს ილია დარჩიაშვილს, პარლამენტის თავმჯდომარის შეფასებით, ის დიპლომატიური გამოცდილების მქონე ადამიანია, რომელსაც ასევე აქვს დიდი გამოცდილება სახელმწიფოს მართვის საკითხებში.
“მისი გამოცდილებიდან გამომდინარე, დარწმუნებული ვარ, რომ საგარეო საქმეთა სამინისტრო კიდევ უფრო გაძლიერდება“, - აღნიშნა შალვა პაპუაშვილმა.