ეკონომიკისა და მდგრადი განვითარების მინისტრის, ვიცე-პრემიერის ლევან დავითაშვილის განცხადებით, ილია დარჩიაშვილი ღირსეული ახალი საგარეო საქმეთა მინისტრი იქნება.

ჟურნალისტების მიერ დასმულ კითხვაზე, სად მიდის აშშ-ში საქართველოს ელჩი დავით ბაქრაძე, ან ვინ იქნება მთავრობის ადმინისტრაციის ახალი ხელმძღვანელი, დავითაშვილმა განაცხადა, რომ ამის შესახებ საზოგადოება აუცილებლად გაიგებს და მას ამ ეტაპზე ინფორმაცია არ აქვს.

„სამწუხაროდ, მე არ მაქვს დამატებითი ინფორმაცია, რომ საზოგადოებას მივაწოდო იქნება შესაბამისი განცხადებები და საზოგადოება გაიგებს იმ გადაწყვეტილების შესახებ, რაც იქნება მიღებული დავით ბაქრაძესთან და კანცელარიის ახალ ხელმძღვანელთან დაკავშირებით. ილია დარჩიაშვილი ჩვენი გუნდის წევრია დიდი ხანია, კომპეტენტური ადამიანია, რომელსაც აქვს ასევე დიდი გამოცდილება დიპლომატიურ სამსახურში მუშაობის. აქვს გამოცდილება მთავრობის ადმინისტრაციის ხელმძღვანელობის პირობებში გუნდთან, კოლეგებთან მუშაობის. ვფიქრობ, ეს გუნდურობა ძალიან მნიშვნელოვანია. ილია დარჩიაშვილი იქნება ღირსეული ახალი საგარეო საქმეთა მინისტრი“, - განაცხადა დავითაშვილმა.

ამასთან, ოპოზიციის შეფასებებზე, რომ ახლა მთავრობაში საკადრო ცვლილებებისთვის ცუდი დრო იყო, დავითაშვილმა აღნიშნა, რომ „ამაზე კომენტარის გაკეთებაც ზედმეტია“.

ცნობისთვის, საგარეო საქმეთა მინისტრად დღეს ილია დარჩიაშვილი დაინიშნა, ხოლო ყოფილი მინისტრი დავით ზალკალიანი აშშ-ში საქართველოს ელჩის პოზიციაზე ინიშნება.