სახალხო დამცველი პოლიტიკურად ანგაჟირებულია, - ასე ეხმაურება პარლამენტის საპროცედურო საკითხთა და წესების კომიტეტის თავმჯდომარე ირაკლი ქადაგიშვილი ადამიანის უფლებათა მდგომარეობის შესახებ ომბუდსმენის ყოველწლიურ ანგარიშს.

მისი თქმით, ამის მიუხედავად, პარლამენტის სახალხო დამცველის მიერ გაგზავნილ დოკუმენტს ყურადღებით შეისწავლის და თუ მასში ობიექტური შენიშვნა იქნება, გაიზიარებს.

“სამწუხაროა, როდესაც სახალხო დამცველი ხშირ შემთხვევაში, პოლიტიკურად ანგაჟირებულია. მისი პოლიტიკურად ანგაჟირებულობა კიდევ ერთხელ დაადასტურა სტრასბურგის სასამართლოს გადაწყვეტილებამ, როცა მთელ კამპანიას ორკესტრირებდა, თითქოსდა, მიხეილ სააკაშვილის უფლებების დარღვევასთან და წამებასთან დაკავშირებით. მისი პოლიტიკური ანგაჟირების მიუხედავად, მის დასკვნას ყურადღებით გავეცნობით და ობიექტურად შევაფასებთ. ის პოლიტიკურად ანგაჟირებულია ხშირ შემთხვევაში ხელისუფლების წინააღმდეგ“, - განაცხადა ქადაგიშვილმა.