ხელისუფლების წარმომადგენლები მოქმედებენ მხოლოდ თავიანთი ინტერესების შესაბამისად. ეროვნული ინტერესი არ შეიძლება იყოს, რომ არ იყო დასავლეთის პარტნიორი და დააშინო მოქალაქეები ომით, - ასე აფასებს ,,საერთაშორისო გამჭვირვალობა - საქართველოს" თავმჯდომარე ეკა გიგაური უკრაინაში მიმდინარე მოვლენებთან დაკავშირებით მმართველი გუნდის წარმომადგენლების განცხადებებს.

მისივე თქმით, შეუძლებელია ხელისუფლების წარმომადგენლები პრაგმატულ პოლიტიკას ახორციელებდნენ, ვინაიდან ,,არ შეიძლება იყო იმ ქვეყნის მხარეს, რომელიც გენოციდს სჩადის და აგებს ომს, შესაბამისად შეიძლება ვივარაუდოთ, რომ მათ რუსეთთან გარკვეული კავშირები, ან ვალდებულებები აქვთ".

„ყველანი ვხვდებით, რომ საქართველოში არის კრიზისული ვითარება, უკრაინაში მიმდინარე ომი გავლენას ახდენს და მოახდენს საქართველოს ვითარებაზე, ასევე იმაზე როგორ განვითარდება მოვლენები ჩვენს ქვეყანაში. ყველას გვადარდებს მთავრობის პოზიციები და გადაწყვეტილებები, რომელსაც ისინი იღებენ, ასევე ის თუ სად მიდის ჩვენი ქვეყანა. ჩემი აზრით, არასწორი მიმართულებით მივდივართ და დასავლელ პარტნიორებს უკვე აქვთ კითხვები თუ სად ვართ ჩვენ. მთავრობა სოლიდარობას არ უცხადებს უკრაინას, არ უერთდებიან საერთაშორისო სანქციების რეჟიმს და ამით არ გამოხატავენ მხარდაჭერას დასავლელი პარტნიორების მიმართ.

ჩემი აზრით, ასე გაგრძელება აღარ შეიძლება, მთავრობამ ფაქტობრივად ამოაშენა კედელი და არავის ელაპარაკება, არ ვიცით რა გადაწყვეტილებებს იღებენ, ან რატომ. არ მჯერა, რომ მათ ალაპარაკებთ პრაგმატული პოლიტიკა, შეიძლება ვივარაუდოთ, რომ გარკვეული კავშირები, ან ვალდებულებები აქვთ რუსეთთან. არ შეიძლება იყო იმ ქვეყნის მხარეს, რომელიც გენოციდს სჩადის და აგებს ომს. ხელისუფლების წარმომადგენლები მოქმედებენ მხოლოდ თავიანთი ინტერესების შესაბამისად, ეროვნული ინტერესი არ შეიძლება იყოს, რომ არ იყო დასავლეთის პარტნიორი და დააშინო მოქალაქეები ომით”, - აღნიშნა ეკა გიგაურმა.