ევროპარლამენტის ანგარიშში ნათლად ჩანს, რომ ევროკავშირში კარგად დაინახეს, თუ რა გზას ადგას საქართველო უკანასკნელი წლების მანძილზე. გაყალბებული არჩევნები, სახელმწიფო ინსტიტუტების მიზანმიმართული ნგრევა, მედიაზე შეტევა, კორუფციის ზრდა - ეს ყველაფერი ნათლად არის ასახული ევროპარლამენტის ანგარიშში, - აცხადებს ,,ერთიანი საქართველოს" ერთ-ერთი ლიდერი ანზორ ბიწაძე.

მისი განცხადებით, პოლიტიკურმა პარტიამ „ერთიანმა საქართველომ” არაერთხელ განაცხადა, რომ ვიზალიბერალიზაციაც კი შესაძლოა დაკარგოს ქვეყანამ, არა თუ ევროკავშირის წევრობის პერსპექტივა, რადგან ისეთი მმართველობის სისტემა როგორიც ჩვენს ქვეყანაში ჩამოყალიბდა, სრულ შეუსაბამობაშია ცივილიზებულ სამყაროსთან.

,,ამ ანგარიშის შემდეგ, საინტერესოა რა პასუხს გასცემს საზოგადოებას ხელისუფლება, რომელმაც ორიოდე კვირის წინ ზარ-ზეიმით გვაუწყა ევროკავშირის წევრობაზე განაცხადის შეტანა. ევროპარლამენტის ანგარიში კიდევ ერთი ნათელი დასტურია, რომ ოპოზიციამაც და საზოგადოებამაც რაც შეიძლება სწრაფად ვიმოქმედოთ - წინააღმდეგ შემთხვევაში საქართველო დაკარგავს კიდევ უფრო მეტ დროს და შესაბამისად პერსპექტივასაც“, - აღნიშნა ანზორ ბიწაძემ.