საქართველოში უკრაინის დროებითი რწმუნებულის ანდრეი კასიანოვის განცხადებით, უკრაინაში სამხედრო-პოლიტიკური მდგომარეობა კონტროლირდება.
როგორც მან საელჩოში გამართულ ბრიფინგზე აღნიშნა, რუსეთი უკრაინაში დიდ დანაკარგს განიცდის, როგორც სამხედრო მოსამსახურეების, ასევე სამხედრო ტექნიკის მხრივ.
„უკრაინაში სამხედრო-პოლიტიკური მდგომარეობა კონტროლირდება. უკრაინის შეიარაღებული ძალები მოწინააღმდეგის შესაკავებლად სამხედრო მოქმედებებს ახორციელებენ. ცალკე მიმართულებით ხდება კონტრშეტევები ჩერნიგოვში, ჰერსონის ოლქსა და მიკოლაევში. მოწინააღმდეგე მხარე ტექნიკისა და სამხედრო მოსამსახურეების მხრივ დიდ დანაკარგს განიცდის, ასევე ახორციელებს მობილიზაციას და ჯარების გადასროლას დონეცკის, ხარკოვისა და ლუგანსკის მიმართულებით. აქტიურ შეტევებს უკრაინის აღმოსავლეთ ნაწილშიც ახორციელებს.
ბელარუსის მხრიდან საფრთხე ძალიან მაღალი რჩება. უკრაინა იტოვებს უფლებას, თუ იქნება მთავარდსარდლის ბრძანება, ბელარუსის ტერიტორიაზე პრევენციული სარაკეტო დარტყმა განახორციელოს იმ საფრთხის შემცველ ობიექტებზე, რომელიც უკრაინას საფრთხეს უქმნის. მინდა დაგარწმუნოთ, რომ ყველა სამხედრო მოქმედება, რომელიც უკრაინის ტერიტორიაზე ხდება, ომის წესების შესაბამისად ხორციელდება. რუს ტყვეებს უკრაინა საერთაშორისო სამართლისა და ჟენევის კონვენციის შესაბამისად ექცევა“,-განაცხადა კასიანოვმა.