საქართველოს საგარეო საქმეთა მინისტრმა ილია დარჩიაშვილმა ლუქსემბურგში, საქართველოსთვის ევროკავშირის კანდიდატი ქვეყნის სტატუსის თვითშეფასების კითხვარის მიღების შემდგომ, მოლდოველ კოლეგასთან, ნიკუ პოპესკუსთან გაცნობითი ხასიათის შეხვედრა გამართა.
ინფორმაციას ამის შესახებ საქართველოს საგარეო საქმეთა სამინისტრო ავრცელებს.
მათივე ცნობით, მინისტრებმა საქართველოსა და მოლდოვას კითხვარის გადმოცემა მიულოცეს და ორი ქვეყნის ევროკავშირში ინტეგრაციის გზაზე ამ ნაბიჯის მნიშვნელობა აღნიშნეს.
უწყების ინფორმაციითვე, მინისტრები აღნიშნულ პროცესში მჭიდრო კოორდინაციაზე, ასევე საქართველოსა და მოლდოვას შორის მჭიდრო და მეგობრული ურთიერთობების კიდევ უფრო განმტკიცებაზე შეთანხმდნენ.