თბილისის სააპელაციო სასამართლოში მამუკა ხაზარაძის, ბადრი ჯაფარიძისა და ავთანდილ წერეთლის სასამართლო პროცესი მიმდინარეობს.

დღეს, ბრალდებისა და დაცვის მხარის სააპელაციო საჩივრების წარდგენის ეტაპია.

როგორც მამუკა ხაზარაძისა და ბადრი ჯაფარიძის ადვოკატი, ზვიად კორძაძე აცხადებს, მსჯავრდებულების მხრიდან არც "ფულის გათეთრების" ჩადენის ფაქტი დადასტურებულა და არც თაღლითობის.

„სააპელაციო საჩივარი წარდგენილია, როგორც პროკურატურის, ასევე, ჩვენ მიერ. 3 წლის წინ, როცა ეს საქმე დაიწყო, ვაცხადებდით, რომ არავითარ ფულის გათეთრებას ადგილი არ ჰქონდა და ეს სასამართლო განაჩენით დამტკიცდა. არავითარ თაღლითობას, მითუმეტეს, ხანდაზმულს აქ ადგილი არ აქვს და თუ ამის დამტკიცება შიდა ინსტანციების სასამართლოში ვერ მოხდება, სტრასბურგისთვის ცალსახა საქმეა მარტივი მიზეზის გამო, ბრალიც არ არსებობდა, ამ საქმეში დაზარალებული არ არის და ფულის გათეთრებიდან თაღლითობაზე გადაკვალიფიცირება მხოლოდ იმის გამო მოხდა, სახე შეენარჩუნებინათ პროკურატურისთვის, რომ 3 წლის განმავლობაში საერთოდ ტყუილ ბრალდებაზე არ ჰქონოდათ აქცენტი გაკეთებული",- განაცხადა კორძაძემ.