ჩვენ გვაქვს ინიციატივა, თბილისის საკრებულოს დელეგაცია, დეპუტატების შემადგენლობით ჩავიდეთ კიევში, - ამის შესახებ ფრაქცია "თბილისი საქართველოსთვის" თავმჯდომარემ ზაზა თავაძემ საკრებულოს სხდომაზე განაცხადა.

ზაზა თავაძის თქმით, კარგი იქნებოდა, რომ უკრაინის დედაქალაქში თბილისის მერიც ჩასულიყო.

"თითოეული ჩვენგანი ვცდილობთ, რომ ჩვენი მხარდაჭერა გამოვხატოთ უკრაინის მიმართ. კარგი იქნებოდა, რომ ქალაქის მერი ჩასულიყო კიევში და მის კოლეგას შეხვედროდა. ჩვენს ფრაქციას აქვს ასეთი ინიციატივა, თქვენ შეგიძლიათ ქალაქის მერსაც მიმართოთ და მისი პოზიცია მოისმინოთ და შეგიძლიათ ცალკე, როგორც გადაწყვეტილების მიმღები პირი საკრებულოსთან მიმართებაში, ხომ არ შეიკრიბოს ჩვენი დელეგაცია რამდენიმე დეპუტატის შემადგენლობით და ხომ არ ჩავიდეთ კიევში, გამოვხატოთ უკრაინელების, კერძოდ კიეველების მიმართ მხარდაჭერა ჩვენი საკრებულოს დელეგაციის სახით", - განაცხადა ზაზა თავაძემ.