რუსეთის ქალაქ სანქტ-პეტერბურგის მერიამ უკრაინაში რუსი გენერლის გარდაცვალების შესახებ სამძიმრის წერილი გამოაქვეყნა.

მერის პრესსამსახურის განცხადებაში აღნიშნულია, რომ ქალაქი მწუხარებას გამოხატავს რუსეთის მე-8 არმიის მეთაურის მოადგილის, გენერალ-მაიორ ვლადიმერ ფროლოვის გამო, რომელიც მიმდინარე კვირაში უკრაინაში გარდაიცვალა.

მათი ინფორმაციით, სანქტ-პეტერბურგის მერი, ალექსანდრე ბეგლოვი დაკრძალვას დაესწრო, რომელიც შაბათს სერაფიმოვსკოეს სასაფლაოზე გაიმართა.

„დღეს ჩვენ ვემშვიდობებით ნამდვილ გმირს. ვლადიმერ პეტროვიჩ ფროლოვი გმირულად დაიღუპა უკრაინელ ნაციონალისტებთან ბრძოლაში. მან სიცოცხლე გაწირა იმისთვის, რომ დონბასში ქალებმა და ბავშვებმა ბომბების აფეთქების ხმა აღარასდროს გაიგონ“, - განაცხადა ბეგლოვმა.