„საერთაშორისო გამჭვირვალობა - საქართველოს" 5 ივლისს დაზარალებული ჟურნალისტების უფლებების დასაცავად შინაგან საქმეთა სამინისტროს წინააღმდეგ სასამართლოში სარჩელი შეაქვს.

„საერთაშორისო გამჭვირვალობა - საქართველოს" ხელმძღვანელის, ეკა გიგაურის განცხადებით, ორგანიზაცია თბილისის საქალაქო სასამართლოს 2021 წლის 5 ივლისის მოვლენების დროს, "მთავარი არხის", "ფორმულას", "TV პირველის" და on.ge-ს დაზარალებული 24 ჟურნალისტის უფლებების დასაცავად სარჩელით დღეს მიმართავს.

მისივე თქმით, შინაგან საქმეთა სამინისტრომ 5 ივლისის მოვლენების დროს, ჟურნალისტები ძალადობრივი ჯგუფების აგრესიისგან და თავდასხმებისგან ვერ დაიცვა და მათი პროფესიული საქმიანობის შესრულებისთვის სათანადო პირობები ვერ უზრუნველყო.

"ამ სარჩელით მორალური ზიანის ანაზღაურებას ვითხოვთ და ასევე, ტელეკომპანიებს, რომელთა ტექნიკაც 5 ივლისის პერიოდში დაზიანდა, ამ ტექნიკის ანაზღაურებაც მოვითხოვოთ.

ჩვენ მზად ვართ, რომ ყველა ინსტანციის სასამართლოში ვიჩივლოთ და ეს საქმე განვიხილოთ და წავიდეთ სტრასბურგში, თუ საჭირო იქნება," - განაცხადა ეკა გიგაურმა.