თვითმხილველი წყნეთში, გუდიაშვილის ქუჩაზე მომხდარ შემთხვევასთან დაკავშირებით გარკვეულ დეტალებზე საუბრობს.

როგორც მან „ინტერპრესნიუსს“ განუცხადა, მამაკაცი, რომელიც პოლიციელის, ერიკ წურწუმიას გასროლის შედეგად გარდაიცვალა, შემთხვევამდე რამდენიმე წუთით ადრე „მიწას თხრიდა, სადაც, სავარაუდოდ, ნარკოტიკულ საშუალებას ეძებდა“.

როგორც გუდიაშვილის ქუჩაზე არსებული ერთ-ერთი სახლის დაცვის თანამშრომელი აცხადებს, მოკლულს ტყვია გულის არეში ჰქონდა მოხვედრილი, გასროლამდე კი ხმაური არ გაუგია.

„გუშინ, დაახლოებით, 7-ის ნახევარზე მოხდა. აქ ტაქსით ამოსულა, ტაქსი ელოდებოდა. ეს ბიჭი ნაძვის ძირში მიწას ხელით თხრიდა. მე მგონი, თვითონ პოლიციელმა იპოვა ნარკოტიკი. ერთი გასროლის ხმა იყო, მერე გაივსო ტერიტორია პოლიციელებით. გარდაცვლილს არანაირი იარაღი არ ჰქონია, მისი ქურთუკი ეგდო გვერდით, გაჩხრიკეს, საბუთებიც არ ჰქონდა, არანაირი წინააღმდეგობა არ გაუწევია. გულის არეში ჰქონდა ნასროლი“,- აცხადებს თვითმხილველი.

ამასთან, კიდევ ერთი ინფორმაციით, გასროლა იმ დროს მოხდა, როცა პოლიციელი და ზურაბ გველესიანი „ერთმანეთს ეჯაჯგურებოდნენ“. არსებული ცნობით, გვესელიანმა პოლიციის გამოჩენისას, სავარაუდოდ, ნარკოტიკების ნაწილი გადაყლაპა, დარჩენილი ნაწილის გადაყლაპვის საშუალება კი მას ერიკ წურწუმიამ არ მისცა.

„ამ მიზეზის გამო ერთმანეთს ეჯაჯგურებოდნენ, რა დროსაც გასროლა მოხდა“, - განუცხადა „ინტერპრესნიუსს“ წყარომ.

ცნობისთვის, 30 წლის ზურა გველესიანის სიცოცხლის გაუფრთხილებლობით მოსპობის ფაქტზე სამართალდამცავებმა შინაგან საქმეთა სამინისტროს ქალაქ თბილისის პოლიციის დეპარტამენტის ძველი თბილისის მე-4 სამმართველოს უფროსი დეტექტივი ერიკ წურწუმია დააკავეს.

გამოძიების ინფორმაციით, ერიკ წურწუმიას ნარკოტიკული საშუალების შესაძლო უკანონო შეძენა-შენახვის ფაქტთან დაკავშირებით შემთხვევის ადგილზე გამოცხადებისას, დაკავების ღონისძიების განხორციელების დროს, შემთხვევით გაუვარდა სამსახურებრივი იარაღიდან, რის შედეგადაც ზურა გველესიანი გარდაიცვალა.

სპეციალური საგამოძიებო სამსახური გამოძიებას საქართველოს სისხლის სამართლის კოდექსის 116-ე და 333-ე მუხლის მე-3 ნაწილის „ბ“ ქვეპუნქტით აგრძელებს.