NDI-ს კვლევასთან დაკავშირებით არ გვაქვს პოზიტიური დამოკიდებულება, არც ჩვენ და არც საზოგადოებას, რადგან ვერც ერთხელ ვერ იქნა მისი ციფრები მიახლოებული იმ რეალობასთან, რომელიც არჩევნების შემდეგ დადგა, - ამის შესახებ საქართველოს პარლამენტის პირველმა ვიცე სპიკერმა გია ვოლსკიმ მედიასთან განაცხადა.
ვოლსკის თქმით, ხელისუფლებამ მდგომარეობის შეფასება უკეთ იცის, ვიდრე NDI-იმ.
„რასაკვირველია გვაქვს საფუძველი, რომ არ ვენდოთ, მაგრამ რეალურად, მდგომარეობის შეფასება გაცილებით უკეთ ვიცით, ვიდრე NDI-მ. უსაფუძვლოა, არავითარი ნდობა NDI-ს ამ ნაწილში არ შეიძლება ჰქონდეს. თუნდაც პრეზიდენტი, რომელსაც ამხელა რეიტინგი დაუწერა NDI-მ თავისი დამოკიდებულების გამო. ყველა ადასტურებს იმას, რომ საქართველო ეკონომიკური სანქციების განხორციელების არანაირი რესურსი არ გააჩნია და ამ დროს NDI წერს საპირისპირო მონაცემებს. ასე რომ, ბევრი შეუსაბამობა არის, გარდა იმისა, რომ დამოკიდებულება არის საკმაოდ ნიჰილისტური. ეკონომიკური დამოკიდებულება, რომ არსებობს სწორედ ამიტომ არის სანქციების დაწესების რესურსი, რომ არ გააჩნია საქართველოს და რუსეთს გააჩნია საქართველოს ეკონომიკურად დანგრევის სერიოზული რესურსი, რაც ყველას ესმის ბრიუსელშიც, ვაშინგტონშიც და საქართველოშიც“, - აღნიშნა ვოლსკიმ.