სოზარ სუბარი - რამდენიმე დღეა ახალი კამპანია დაიწყო „ქართული ოცნების“ წინააღმდეგ „ომის პარტიამ“ და როგორც ყოველთვის, ეს კამპანია მთლიანად ეწინააღმდეგება საქართველოს ეროვნულ ინტერესებს

რას ვითხოვთ საქართველოს ხელისუფლებისგან და საქართველოსგან, რა უნდა გავაკეთოთ ისეთი, თუ მიზანი არ არის, რომ საპასუხო ქმედებებზე რუსეთი გამოვიწვიოთ? ნუ დაგვავიწყდება, რომ ეს საპასუხო ქმედებები ნაკლებად მოსალოდნელია სარკისებური იყოს და ჩვენს მიერ მიღებულ მორიგ რეზოლუციას საპასუხო რეზოლუცია [მოჰყვეს]. ნურც იმას დავივიწყებთ, რომ ოკუპირებულ ტერიტორიებზე - გალსა და ახალგორში 50 ათასამდე ქართველი ცხოვრობს და შეიძლება პირველ სამიზნედ სწორედ ისინი იქცნენ და კიდევ 50 ათასი დევნილი მივიღოთ საქართველოში, - ამის შესახებ უმრავლესობის წევრმა სოზარ სუბარმა პარლამენტის პლენარულ სხდომაზე განაცხადა.

როგორც სუბარმა თავის გამოსვლაში აღნიშნა, ოპოზიციის ანტისახელმწიფოებრივი ქმედების ბევრი მაგალითის მოყვანა შეუძლია, თუმცა როდესაც ისინი საუბრობენ უკრაინაში განვითარებული მოვლენების გამო საქართველოს მიერ სხვა ქვეყნებთან ერთად დაწესებულ სანქციებზე, საზოგადოების შეცდომაში შეყვანას ცდილობენ.

„რამდენიმე დღეა ახალი კამპანია დაიწყო „ქართული ოცნების“ წინააღმდეგ „ომის პარტიამ“ და როგორც ყოველთვის, ეს კამპანია მთლიანად ეწინააღმდეგება საქართველოს ეროვნულ ინტერესებს და ამით არის ხოლმე ყოველთვის გამორჩეული. ამის ნათელი მაგალითი იყო „ნაციონალური მოძრაობის“ მიერ საპარლამენტო დელეგაციაში მონაწილეობაზე უარის თქმა და ცალკე სეპარატისტული გაპარვა, შემდეგ ამას დაემატა რუსეთისგან მიღებული ვითომ ფარული ჩანაწერები და მათი აბსურდული ინტერპრეტირება, არახამიას მორიგი ანტიქართული გამოხტომა და საქართველოს მიმართ სანქციების დაწესების მოთხოვნა, სააკაშვილის სიკვდილ-სიცოცხლის თემით მორიგი მანიპულირება და ყველა ამ თემაზე მედიასა და სოცქსელებში კარგად ორგანიზებული კამპანია. როგორც ყოველთვის, მსგავს კამპანიებს ერთი საერთო ხაზი აქვთ ხოლმე - ყველა განცხადება, ყველა მოთხოვნა საქართველოს და მისი ინტერესების წინააღმდეგ არის მიმართული“, - განაცხადა სოზარ სუბარმა.

მისივე თქმით, მთელი ამ კამპანიის არსი და მიზანი ჯერ კიდევ 29 მარტს მკაფიოდ გამოთქვა უკრაინის ეროვნული უშიშროებისა და თავდაცვის საბჭოს მდივანმა, ოლექსეი დანილოვმა, დღეს კი კიდევ უფრო მკაფიოდ დაადასტურა უკრაინის პრეზიდენტის ოფისის ხელმძღვანელის მრჩეველმა, ალექსეი არესტოვიჩმა.

„ოლექსეი დანილოვი: „საქართველო, რბილად რომ ვთქვათ, არც თუ ისე სწორად იქცევა. თუ დნესტრისპირეთი და საქართველო, დღეს დაკავებულნი იქნებიან თავიანთი ტერიტორიების დაბრუნებით, ეს აუცილებლად დაგვეხმარება, რადგან რუსებს ექნებათ რაიმე გასაკეთებელი გარდა ჩვენი ქალაქებისა და სოფლების განადგურებისა, ჩვენი ბავშვებისა და ქალების მკვლელობისა“. ალექსეი არესტოვიჩი: „განვიხილავდით სადმე მეორე ფრონტის გაჩენის შესაძლებლობას იმისთვის, რომ, პირდაპირ ვთქვათ, თავის ტკივილი შევუქმნათ მოსკოვს; რომ მას ნაწილობრივ უკრაინის თავი არ ჰქონდეს. არც მოლდოვისა და, მით უმეტეს, არც საქართველოს ხელმძღვანელობა, ჯერ არ არის მზად ასეთი გადაწყვეტილებებისთვის... პრინციპში, ესენი არ არიან ომის ადამიანები. სააკაშვილს შეეძლო ამის გაკეთება, თუმცა არა ამჟამინდელ ხელმძღვანელობას“, - განაცხადა სუბარმა.

მისივე თქმით, ეს აბსოლუტურად მიუღებელი პოზიციაა, თუმცა, მისივე შეფასებით, ომში ჩაბმული ქვეყნის ლიდერებს ასეთი სურვილები რომ ჰქონდეს, ამის გაგება შეიძლება, მაგრამ „როცა იგივე მცდელობებს ქართული ოპოზიციის მხრიდან ვხედავთ, ეს გაუგებარიც არის და მიუღებელიც“.

„ორი თვეა, მთელი საქართველო უკრაინის ტკივილით ვცხოვრობთ. გული მიკვდება, როცა ვუყურებ განადგურებული ირპენის, ბუჩას, მარიუპოლის კადრებს. მაგრამ ისიც კარგად გვახსოვს, სულ რაღაც 14 წლის წინ როგორ გამოიყურებოდა ულამაზესი ქართული სოფლები - კეხვი, ქურთა, თამარაშენი, ნული, ავნევი... აღარ ჩამოვთვლი, ყველამ ვიცით ეს სახელები. დღეს ამ სოფლების ადგილზე ნასოფლარიც კი არ არის დარჩენილი და ნურავინ დამძრახავს, თუ არ მინდა, რომ ეს ჩამონათვალი კიდევ უფრო გაიზარდოს“, - განაცხადა სოზარ სუბარმა.

ალექსეი გარანი - კიევსა და მოსკოვს შორის მინსკი 2-ის მსგავსი არანაირი შეთანხმება არ გაფორმდება, რადგან, რაც რუსეთმა  უკრაინაში 24 თებერვლის შემდეგ ჩაიდინა, ეს წარმოუდგენელია
ზაზა ფირალიშვილი - ენტონი ბლინკენის წერილი საქართველოს საგარეო საქმეთა მინისტრისადმი აშკარა ნიშანია იმისა, რომ ჩვენი ხელისუფლების ქცევა ევროატლანტიკურ სივრცეში სერიოზულ ეჭვებს იწვევს
ქართული პრესის მიმოხილვა 26.05.2022
ანაიტ ვოსკანიანი - სომხეთი მსოფლიოს ყველა ტიპის ტურისტისთვის მიმზიდველი ქვეყანაა
PSP-ს გუნდი ფუტსალის ლიგის 1/2 ფინალშია
ბაზისბანკმა ბიზნესში 305 მილიონი ლარის ინვესტიცია განახორციელა
„ლისი ინტელიგენციის“ განვითარებისთვის დახარჯული ჯამური ინვესტიცია 1 500 000 ლარს უტოლდება
Fitch Ratings-მა ბაზისბანკს საკრედიტო რეიტინგი „B+“ დაუდასტურა