უკრაინა საკუთარი საჰაერო სივრცის უმეტეს ნაწილზე კონტროლს ინარჩუნებს, - ამის შესახებ გაერთიანებული სამეფოს თავდაცვის უწყების დაზვერვის განახლებულ ინფორმაციაშია აღნიშნული.

„უკრაინა ინარჩუნებს კონტროლს საკუთარი საჰაერო სივრცის უმეტეს ნაწილზე. რუსეთმა ვერ შეძლო უკრაინის საჰაერო ძალების ეფექტური განადგურება ან უკრაინის საჰაერო თავდაცვის ჩახშობა,“ - ნათქვამია ანგარიშში.

შეფასების თანახმად, რუსეთის საჰაერო აქტივობა ახლა "უპირველეს ყოვლისა სამხრეთ და აღმოსავლეთ უკრაინაზეა ორიენტირებული", რათა იქ სახმელეთო ძალების მხარდაჭერა უზრუნველყოს. ამასთან, ბროტანეთის თავდაცვის უწყებაში აცხადებენ, რომ რუსეთის წვდომა "უკრაინის ჩრდილოეთით და დასავლეთით" "ძალიან შეზღუდულია“.

ალყაში მოქცეულ ქალაქ მარიუპოლში მშვიდობიანი მოსახლეობის დაღუპვასთან დაკავშირებით, თავდაცვის სამინისტროში აცხადებენ, რომ სავარაუდოდ, რუსეთი „საჰაერო თავდასხმებს უმართავი ბომბების გამოყენებით ახორციელებს, რაც ზრდის მშვიდობიანი მოსახლეობის მსხვერპლის რისკს".

ბრიტანეთის თავდაცვის უწყების ცნობით, რუსეთი აგრძელებს თავდასხმას უკრაინის ინფრასტრუქტურასა და სამხედრო აქტივებზე მთელი ქვეყნის მასშტაბით.