სანამ მიხეილ სააკაშვილი ვერ გადახარშავს, რომ მისი დესანტირების მიზნები ჩაფუშულია და საქართველოს მოსახლეობას ის ამოცანები არა აქვს, რაც მას და ალექსანდრ არესტოვიჩს ჰქონდათ, მანამდე იქნება მუდმივად “ავადა ვარ”-ს ძახილში, - ეს განცხადება ჟურნალისტებთან "ქართული ოცნების" დეპუტატმა ირაკლი ქადაგიშვილმა გააკეთა.
მისივე თქმით, "იმისათვის, რომ მიხეილ სააკაშვილი ომის პრეზიდენტი გამხდარიყო, მისი დესანტირება საქართველოში მოხდა, თუმცა ციხეში აღმოჩნდა, რაც მათ გეგმებში აბსოლუტურად არ შედიოდა".
"აქედან გამომდინარე, თვეების განმავლობაში გვესმის საუბარი იმის თაობაზე, რომ მიხეილ სააკაშვილი შიმშილობს ისე, რომ სიკვდილის პირას არის და ა.შ. ეს არის დაუსრულებელი სპეკულაცია. შესაბამისი სამსახური მისი ჯანმრთელობის მდგომარეობაზე ინფორმაციას გვაწვდის და მისი როგორც ჯანმრთელობა, ასევე პატიმრის უფლებები დაცულია. სტრასბურგის სასამართლომ ეს სურათი დაგვანახა, როცა მის მიმართ არადამიანური და წამების საქმე არ განიხილა. ვინც საჯარო ინფორმაციას გაეცნობა, ნათელი ხდება, რომ ამ ადამიანის უფლება კი არ ირღვევა, არამედ დემოკრატიის უფლებები ირღვევა, როცა პატიმარი სცემს და აგინებს პენიტანციალური სამსახურის წარმომადგენლებს", - განაცხადა ირაკლი ქადაგიშვილმა.