დაველოდოთ როდის დამარცხდება რუსეთი, დაინგრევა რუსეთის სამხედრო მანქანა და მოხდება კრემლის დეპუტინიზაცია, მერე კი გავზომოთ „ქართული ოცნების“ რეიტინგი, - ამის შესახებ „ნაციონალური მოძრაობის“ ერთ-ერთმა ლიდერმა, პეტრე ცისკარიშვილმა პარტიის ოფისში გამართულ ბრიფინგზე განაცხადა, რითაც გამოეხმაურა ჟურნალისტის მიერ დასმულ კითხვას იმის შესახებ, თუ რამ განაპირობა IRI-ის მიერ ჩატარებულ კვლევაში 9%-ით იმ ადამიანთა რაოდენობის მატება, ვინც „ნაციონალურ მოძრაობას“ არ მისცემს ხმას.

ცისკარიშვილი მიიჩნევს, რომ საჭიროა მსგავს კვლევას დაველოდოთ, როდესაც რუსეთის აგრესია უკრაინაზე დასრულდება.

„მარტის დასაწყისში ჩატარებულ კვლევაში ჩვენი მოსახლეობას დაახლოებით 70% თვლის, რომ ეს ჩვენი ომიც არის, რადგან რუსეთი ორივე ქვეყნის საერთო მტერია. აქედან გამომდინარე, გასაგებია, რომ საზოგადოებას სტაბილურობა უნდა და არ სურს იმ ნავის გაქანავება, რომელშიც ყველა ერთად ვსხედვართ. დაველოდოთ ომი როდის დასრულდება, როდის დამარცხდება რუსეთი, დაინგრევა რუსეთის სამხედრო მანქანა და მოხდება კრემლისა და რუსეთის დეპუტინიზაცია და მერე გავზომოთ „ქართული ოცნების“ რეიტინგი“, - განაცხადა პეტრე ცისკარიშვილმა.