ამ შემთხვევაში შეიძლება „საირმე“ ან „ნაბეღლავი“ დავლიოთ - ჩვენ შეგვიძლია ვთქვათ, რომ გვქონდა საშუალება, სანქცირებული რუსი ბიზნესმენისათვის კომპანიის 60% არ გადაგვეცა, მაგრამ მამუკა ხაზარაძემ გადასცა! - ასეთი იყო პარლამენტის პირველი ვიცე-სპიკერის გია ვოლსკის პასუხი “ბორჯომის“ წარმოების შეჩერების თაობაზე ჟურნალისტების მიერ დასმულ კითხვაზე.
ვოლსკი შეფასებით, კითხვები, თუ რატომ მოხდა ასე, მამუკა ხაზარაძესთან უნდა დაისვას.
„აღნიშნული ბიზნესგარიგება იმ პერიოდში ალბათ აბსოლუტურად ნორმალური გარიგება იყო. დღეს ასეთი რეალობა შეიქმნა. სამწუხაროდ, ამ რეალობას გვერდს ვერ ავუვლით. არსებობს გარკვეული ინტერესები, რომელიც ქვეყანას გააჩნია - რაც შეიძლება მეტი ხარისხიანი პროდუქტი აწარმოო და რაც შეიძლება მეტ ქვეყანაში გაიტანო. ეს არის ფორმულა, რომლითაც ბიზნესი და ნებისმიერი ქვეყანა არსებობს. “ბორჯომი“ ქართული ბრენდია და ძალიან დასანანია თუ მან საქმიანობა შეწყვიტა“, - განაცხადა გია ვოლსკიმ.
კომპანია „IDS ბორჯომი საქართველო“ აცხადებს, რომ იძულებულია, მიმდინარე წლის 29 აპრილიდან დროებით შეაჩეროს ბორჯომის ჩამომსხმელ ორივე ქარხანაში წარმოების პროცესი. როგორც განცხადებაშია ნათქვამი, აღნიშნულის მიზეზი უკრაინაში მიმდინარე საომარი მოქმედებებია.