პარტია „ქართული ოცნების" თავმჯდომარე, ირაკლი კობახიძე იმედოვნებს, რომ უკრაინა, საქართველო და მოლდოვა ევროკავშირის წევრობის კანდიდატი ქვეყნის სტატუსს მიიღებენ.
როგორც მან ჟურნალისტებს განუცხადა, ამის პერსპექტივა არსებობს.
„იმედი გვაქვს, რომ სამივე ქვეყანასთან, უკრაინა, საქართველოსა და მოლდოვასთან მიმართებით დადებითი გადაწყვეტილება იქნება მიღებული. სამწუხაროდ, ბოლო დროს იყო რამდენიმე არცთუ დადებითი განცხადება გაკეთებული ევროპელი ლიდერების მხრიდან ამ კუთხით, მითუმეტეს, კონსენსუსია საჭირო გადაწყვეტილების მიღებისთვის, ეს ცოტა გვაშფოთებს, თუმცა, საბოლოოდ, იმის იმედი გვაქვს, რომ სამივე ქვეყანასთან მიმართებით დადებითი გადაწყვეტილება იქნება მიღებული და სამივე ქვეყანა, საქართველო, უკრაინა და მოლდოვა, მიიღებს კანდიდატი ქვეყნის სტატუსს. ამის პერსპექტივა არის ძალიან კარგი და შესაბამისად, ჩვენ ამის იმედი უნდა დავიტოვოთ“,-განაცხადა კობახიძემ.
ცნობისთვის, საქართველოს პრემიერ-მინისტრი ირაკლი ღარიბაშვილი ევროკავშირის კითხვარის პირველ ნაწილს ევროკავშირის ელჩ კარლ ჰარცელს დღეს გადასცემს. როგორც პრემიერმა მთავრობის სხდომის დაწყებამდე განაცხადა, ევროკავშირის კითხვარის მეორე ნაწილზე მუშაობა უკვე მიმდინარეობს და 13 მაისამდე მზად იქნება.