არ მეგულება ქვეყანა, რომლის მიმართ უკრაინის ხელისუფლების წარმომადგენლებს საყვედურები და უკმაყოფილება არ გამოეხატათ - დასაწყისში ინგლისსაც მისწვდნენ, მაგრამ დღეს ინგლისზე აღარ საუბრობენ, - ეს განცხადება „ქართული ოცნების“ დეპუტატმა ირაკლი ქადაგიშვილმა უკრაინის ეროვნული უსაფრთხოების საბჭოს მდივნის ალექსეი დანილოვის იმ ინფორმაციის კომენტირებისას გააკეთა, რომლის მიხედვით, უნგრეთმა უკრაინის წინააღმდეგ თავდასხმის მზადების შესახებ წინასწარ იცოდა და უკრაინის გარკვეული ტერიტორიის მითვისებაც სურდა.
როგორც ქადაგიშვილმა აღნიშნა, უნგრეთსა და უკრაინას შორის საუკეთესო ურთიერთობები და თანამშრომლობა არასდროს იყო და უნგრეთი რუსეთთან უფრო მეტად თანამშრომლობდა.
რაც შეეხება საქართველოს, ქადაგიშვილის თქმით, „უკრაინის ხელისუფლება საქართველოს მიმართ აბსურდულ ბრალდებს ნონ სტოპ რეჟიმში აკეთებს, რომლის მიზანი რუსეთის სამხრეთში ან აღმოსავლეთში მეორე ფრონტის გახსნაა“.
„ისინი თვლიან, რომ საქართველო ამისთვის ყველაზე პერსპექტიული ადგილია, მით უფრო, რომ საქართველოში მოკავშირის სახით „ნაციონალური მოძრაობა“ ეგულებათ. ბრალდებები აბსოლუტურად აბსურდულია, რაც საქართველოს ომში ჩათრევას და დანგრევას გულისხმობს. ეს კი მოსახლეობისთვის აბსოლუტურად მიუღებელია“, - განაცხადა ირაკლი ქადაგიშვილმა.