წარმოიდგინეთ, საქართველოში მინიმალური ხელფასი განსაზღვრულია ედუარდ შევარდნაძის მიერ, თვეში 20 ლარი - დღეს ჩვენ ვითხოვთ, მინიმალური ხელფასის ის ოდენობა განისაზღვროს, რაც შესატყვისი იქნება იმ რეალობისათვის, რაც ქვეყანაში გვაქვს, - ამის შესახებ პარტია “ხალხისთვის” ლიდერმა, ანა დოლიძემ განაცხადა.
მისივე თქმით, არ შეიძლება მაღაროში მომუშავე და გაყიდვების სფეროში დასაქმებულ ადამიანს ერთი და იგივე მინიმალური ხელფასი ჰქონდეთ დადგენილი, რადგან მათი შრომა განსხვავებულია.
“მინიმალური ხელფასის პრობლემას ჩვენი პარტია “ხალხისთვის” მუდმივად ახმოვანებს. ყველამ კარგად ვიცით, როგორ გაძვირდა ფასები და რამხელა ინფლაციაა ქვეყანაში. ის 200-300 ლარი, რომელიც დადგენილი იყო ხელფასად, ჩვენი მოსახლეობის მხოლოდ ერთ მესამედ ნაწილს ყოფნის. უნდა წარმოიშვას მსჯელობა ბიზნეს სექტორებთან,” - აღნიშნა დოლიძემ.
პარტია “ხალხისთვის” ლიდერმა ასევე ყურადღება ახალგაზრდების დასაქმების თემასთან დაკავშირებით გაამახვილა. მისი განცხადებით, ახალგაზრდები ძალიან ცუდ სიტუაციაში არიან და ერთ-ერთი მიზეზი იმისა, რომ მათ სწავლის დაწყება, ან გაგრძელება უჭირთ, არის ის, რომ ისინი მუშაობენ.
“თითქმის ყველა ახალგაზრდა დღეს არის დასაქმებული და ცდილობენ, თავიანთი შრომით ირჩინონ თავი. ეს ძალიან სასიხარულოა, მაგრამ ჩვენ უნდა ვეცადოთ მათ ნორმალური ანაზღაურება შევთავაზოთ. ასევე სტაჟირებები, რომლებიც ანაზღაურებადი იქნება.
თუ ჩვენ ახალგაზრდებს არ მივაქცევთ ყურადღებას ისინი ევროპაში წავლენ და ჩვენ მათ დავკარგავთ. მათ უნდა დავუდგინოთ სპეციალური საგადასახადო შეღავათები, რადგან ისინი მუშაობენ. მათ მუშაობასთან ერთად სწავლა-განათლება სჭირდებათ. ამიტომ ჩვენ მათ წინსვლას მაქსიმალურად უნდა შევუწყოთ ხელი,“ - განაცხადა ანა დოლიძემ.