არსებული ინფორმაციით, მმართველი გუნდი საკანონმდებლო ინიციატივას ამზადებს, რომლის გათვალისწინებით, ბათუმის საკრებულოში მაჟორიტარი დეპუტატის უფლებამოსილებას საკრებულოს ნაცვლად, ცესკო ცნობს. როგორც ჟურნალისტებს მმართველი გუნდის წევრმა განუცხადა, პირადად ის აღნიშნულ ინიციატივას მხარს დაუჭერს.

„მხარს დავუჭერ საკანონმდებლო ინიციატივას, რომლის მიხედვით, რადიკალურ ჯგუფებს საკრებულოს საქმიანობის პარალიზების შესაძლებლობა არ მიეცემათ - ხელისუფლებამ ამისთვის ყველაფერი უნდა გააკეთოს!“ - ასეთია “ქართული ოცნების“ დეპუტატის გიორგი კახიანის პოზიცია ბათუმის საკრებულოსთან დაკავშირებით კანონში დაგეგმილ ცვლილებებზე.

კანონის პროექტი პარლამენტში ჯერ ინიცირებული არ არის, თუმცა სავარაუდოდ, ბიუროს უახლოეს სხდომაზე გავა.

“რადიკალურ, სრულიად დესტრუქციულ ძალებს საკრებულოების პარალიზების შესაძლებლობა არ უნდა მიეცეთ. ჩვენ თვალს ვადევნებთ, როცა რადიკალური ოპოზიცია ბათუმში საკრებულოს მუშაობის პარალიზებას ცდილობს. ამიტომ ხელისუფლებამ ამის საწინააღმდეგოდ ყველაფერი უნდა გააკეთოს. აღნიშნულ ინიციატივას პირადად მე არ გავცნობივარ, მაგრამ თუკი ასეთი ინიციატივა არსებობს, ამ მიზანს უნდა ემსახურებოდეს. საკრებულოს პარალიზება ბათუმელების ინტერესების დაუცველობას და ბათუმის სასარგებლოდ კონკრეტული მოქმედებების ვერ განხორციელებას ნიშნავს“, - განაცხადა გიორგი კახიანმა.