გიორგი შარაშიძე - იმედია, პარლამენტი მხარს არ დაუჭერს ანტისახელმწიფოებრივ ინიციატივას და დეპუტატის უფლებამოსილების ცნობა ხალხის მიერ არჩეული დეპუტატების უფლება იქნება
იმედია, პარლამენტი მხარს არ დაუჭერს ანტისახელმწიფოებრივ ინიციატივას და დეპუტატის უფლებამოსილების ცნობა ხალხის მიერ არჩეული დეპუტატების უფლება იქნება, - ამის შესახებ ფრაქცია „თბილისი საქართველოსთვის“ წევრმა გიორგი შარაშიძემ თბილისის საკრებულოს სხდომაზე განაცხადა.
გიორგი შარაშიძე მმართველი პარტიის ინიციატივას გამოეხმაურა, რომლის მიღების შემთხვევაში შუალედურ არჩევნებში გამარჯვებული კანდიდატის უფლებამოსილების ცნობა საკრებულოს წევრების თანხმობის ნაცვლად, ცენტრალური საარჩევნო კომისიის გადაწყვეტილების საფუძველზე მოხდება.
„არ შემიძლია არ გამოვეხმაურო „ოცნების“ მიერ პარლამენტში ინიცირებულ საკანონმდებლო ცვლილების პროექტს, რომლის მიხედვითაც შუალედურ არჩევნებში გამარჯვებული კანდიდატის უფლებამოსილების ცნობა არა ხალხის მიერ არჩეული საკრებულოს წევრების თანხმობით, არამედ ცენტრალური საარჩევნო კომისიის გადაწყვეტილების საფუძველზე მოხდება. რა ევროინტეგრაციაზე გვაქვს საუბარი, რა ევროპული სტანდარტის დემოკრატიაზე გვაქვს საუბარი, რომლის მთავარ ქვაკუთხედს სწორედ ადგილობრივი თვითმმართველობა წარმოადგენს, როცა ხელისუფლება საკუთარ ინტერესებზე ირგებს კანონს, ფაქტობრივად ითვისებს სახელმწიფოს და ხალხს ართმევს არჩევანის უფლებას?!
ამიტომ, დღეს როცა ქვეყანა ევროინტეგრაციის პროცესის გადამწყვეტ ეტაპზეა, მოვუწოდებთ ხელისუფლებას, შეწყვიტონ ანტიდემოკრატიული, კანონსაწინააღმდეგო ქმედებები და არ შეუქმნან საფრთხე საქართველოს ევროინტეგრაციის ისტორიულ პროცესს.
იმედი მაქვს, პარლამენტი მხარს არ დაუჭერს ამ ანტისახელმწიფოებრივ ინიციატივას და ხალხის მიერ არჩეული დეპუტატის უფლებამოსილების ცნობა კვლავ ხალხის მიერ არჩეული დეპუტატების უფლება და მოვალეობა იქნება“, - განაცხადა გიორგი შარაშიძემ.
ამასთან, საკრებულოს სხდომაზე ფრაქცია „თბილისი საქართველოსთვის" წევრმა გიორგი შარაშიძემ მიმართა პოლიტიკურ პარტიებს, მოუწოდონ ევროკავშირს მიანიჭონ საქართველოს კანდიდატის სტატუსი.
„თბილისის საკრებულოს სხდომიდან მინდა კიდევ ერთხელ დავაფიქსირო პარტია „საქართველოსთვის“ პოზიცია საქართველოს ევროკავშირში ინტეგრაციის ისტორიულ პროცესთან დაკავშირებით და მოვუწოდო ერთის მხრივ, ევროკავშირს, საქართველოს მიანიჭოს კანდიდატი ქვეყნის სტატუსი, ხოლო მეორეს მხრივ, ყველა პოლიტიკურ ძალას, შემოგვიერთდნენ ამ მოწოდებაში!
დღეს, ისე როგორც არასდროს, მნიშვნელოვანია ერთიანობა, ერთობლივი ძალისხმევის მიმართვა იმ დიდი მიზნისკენ, რასაც ჰქვია საქართველოს ევროპული მომავალი, რაც საქართველოს თავისუფალ მომავალს ნიშნავს", - განაცხადა გიორგი შარაშიძემ.
