დედაქალაქის მერის, კახა კალაძის განცხადებით, „ნაციონალური მოძრაობა" შეურაცხმყოფელი სიტყვებით ამკობს დიპლომატიური კორპუსის იმ წარმომადგენლებს, რომლებსაც მათგან განსხვავებული აზრი აქვთ.
აღნიშნულით მან ჟურნალისტის კითხვას უპასუხა, როგორ შეაფასებს ის გერმანიის ელჩის მიმართ კრიტიკას G7-ის სამიტთან დაკავშირებული პოზიციების გამო.
„პირველი შემთხვევა არ არის, როდესაც დიპლომატიური კორპუსის წარმომადგენლების მიმართ აგრესიას და თავდასხმებს ვხედავთ. სამწუხაროდ, ძალიან ბევრი შემთხვევა იყო, როდესაც არ ერიდებოდნენ და პირდაპირი ეთერის მეშვეობით შეურაცხმყოფელ სიტყვებით ამკობდნენ დიპლომატიური კორპუსის წარმომადგენლებს, თუ "ნაციონალური მოძრაობისგან" განსხვავებული პოზიცია ჰქონდათ",- აღნიშნავს კალაძე.
გარდა ამისა, მან ე.წ. სამხრეთ ოსეთში რუსეთთან შეერთების შესახებ ე.წ. რეფერენდუმის ჩატარებაზეც ისაუბრა და განმარტა, რომ „ეს არის ჩვეულებრივი ფარსი, როგორც მათი ე.წ. არჩევნები“.
„ჩვენ საერთაშორისო თანამეგობრობასთან ერთად ყოველთვის ვმუშაობთ, რათა მოხდეს დეოკუპაცია მშვიდობიანი გზით“, - აღნიშნავს კალაძე.