საქართველოს სახელმწიფო საზღვრის უკანონო კვეთაში ბრალდებული მესამე პრეზიდენტის, მიხეილ სააკაშვილის სასამართლო პროცესი გადაიდო.

მორიგი სხდომა 25 მაისს, 14:00 საათზე გაიმართება.

პროცესის გადადების მიზეზი სააკაშვილის მიერ გამოგზავნილი წერილი გახდა, რომლის მიხედვითაც, ის მისი დასწრების გარეშე სასამართლო სხდომის გაგრძელებაზე უარს აცხადებდა.

მოსამართლეს დღევანდელ პროცესზე დაცვის მხარის შუამდგომლობაზე, რომლის მიხედვითაც ისინი სააკაშვილთან ექსპერტების შეშვებას ითხოვენ, პასუხი უნდა გაეცა. მოსამართლის განმარტებით, პენიტენციური სამსახურიდან გამოგზავნილი წერილი მას ჯერ არ მიუღია.

შეგახსენებთ, რომ მიხეილ სააკაშვილის მიერ საზღვრის უკანონო კვეთის ფაქტთან დაკავშირებით გამოძიება პირველ ოქტომბერს დაიწყო. აღნიშნული საქმის ფარგლებში ბრალდება კიდევ 4 პირს - ელგუჯა ცომაიას, ზურაბ და შალვა წოწორიებსა და გიორგი ნარიმანიძეს აქვთ წაყენებული და ის ცალკე წარმოებად მიმდინარეობს.

აღნიშნული პირები ბრალს აღიარებენ.