ოკუპირებული ე.წ. სამხრეთ ოსეთის რუსეთის შემადგენლობაში შესვლის შესახებ გადაწყვეტილება მოითხოვს ყველა ფაქტორის გათვალისწინებას, მათ შორის, გეოპოლიტიკურ ვითარებას. ამის შესახებ რუსეთის საგარეო საქმეთა მინისტრის მოდგილემ ანდრეი რუდენკომ განაცხადა.

მისი თქმით, გაერთიანების შესახებ გადაწყვეტილებას დასჭირდება ორი მხარის მონაწილეობა.

„თავდაპირველად შევხედავთ იმას, თუ როგორ უყრიან კენჭს რეფერენდუმზე სამხრეთ ოსეთის მოქალაქეები და შესაბამისად, დაველოდებით რუსეთის ფედერაციის რეაქციას. აქ მხედველობაში მისაღებია ფაქტების ერთობლიობა, მათ შორის, დღევანდელი გეოპოლიტიკური ვითარება, თანადროულობის საკითხი და ამ გადაწყვეტილების მიზანშეწონილობა სწორედ დღეს“, - განაცხადა რუდენკომ რუსეთის დუმაში დღევანდელი გამოსვლისას.

ლავროვის მოადგილის განცხადებით, რუსეთი თვალს მიადევნებს იმას, თუ როგორ მიმდინარეობს „სამხრეთ ოსეთში“ რეფერენდუმისთვის მზადების პროცესი.