პარლამენტმა კანონპროექტი „სპეციალური საგამოძიებო სამსახურის შესახებ" საქართველოს კანონში ცვლილების შეტანის თაობაზე" საბოლოო - მესამე მოსმენით განიხილა და 77 ხმით, ერთხმად მიიღო.

საქართველოს პარლამენტის ინფორმაციით, ცვლილებით სპეციალური საგამოძიებო სამსახურის ორგანიზაციულ და ფინანსურ უზრუნველყოფასთან და იძულების ღონისძიებების გამოყენების უფლებასთან დაკავშირებული საკითხები წესრიგდება.

მათივე ცნობით, საკანონმდებლო ცვლილებები ასევე, სპეციალური საგამოძიებო სამსახურის სამსახურებრივი ინსპექტირების განმახორციელებელი სტრუქტურული ერთეულის თანამშრომლის და საგამოძიებო დანაყოფის თანამშრომლის დისციპლინური პასუხისმგებლობის, ასევე, მათი თანამდებობაზე დანიშვნასა და მათ მოვალეობებთან დაკავშირებულ საკითხებს ეხება.

„კანონპროექტის ერთ-ერთი ინიციატორის და მომხსენებლის, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველი მოადგილის, ალუდა ღუდუშაურის განცხადებით, კანონპროექტში რედაქციული ხასიათის ცვლილებები არ შესულა.

პარლამენტმა, ასევე, მესამე მოსმენით განიხილა და მხარი დაუჭირა თანმდევ კანონპროექტებს, რომელთა მიხედვით ცვლილებები, ასევე, პატიმრობის კოდექსში, საჯარო სამსახურის და საჯარო დაწესებულებაში შრომის ანაზღაურების შესახებ კანონებში შედის.

საკანონმდებლო ინიციატივა პარლამენტის წევრებს ანრი ოხანაშვილს, ალუდა ღუდუშაურს, დავით მათიკაშვილს, გურამ მაჭარაშვილს, რატი იონათამიშვილს, ალექსანდრე ტაბატაძეს და მიხეილ სარჯველაძეს ეკუთვნის“, - აღნიშნულია ინფორმაციაში.