თქვენ ხომ მტკიცებულებებს ითხოვდით „ევროპულ დერეფნებში რას ვაკეთებთო“ - აქ რასაც აკეთებთ, ალბათ, იმას, - ასე მიმართა “ქართული ოცნების” აღმასრულებელმა მდივანმა, მამუკა მდინარაძემ, ოპოზიციას პარლამენტის პლენარულ სხდომაზე სიტყვით გამოსვლისას.

როგორც მდინარაძემ განაცხადა, ოპოზიცია ყველაფერს გააკეთებს, რომ საქართველომ კანდიდატის სტატუსი არ მიიღოს.

„რა გგონიათ, ჩვენი პარლამენტი დახურული სივრცეა, ევროპაში ეს ნიუსები არ გადის, რასაც აქ კადრულობთ თუ როგორ გგონიათ? იქ სხვა რამეს ამბობთ და აქ სხვა რამეს ამბობთ?

ქალბატონი სალომე (სამადაშვილი), რომელმაც ბრძანა - „ ჩვენი განაცხადის წარუმატებლობის შემთხვევაში „ქართულმა ოცნებამ“ უნდა აიღოს პოლიტიკური პასუხისმგებლობა და მთელი შემადგენლობა გადადგეს“, გამოააშკარავა გეგმა, დაიდო გეგმა. მე მჯერა, რომ თქვენ ყველაფერს გააკეთებთ ამ გეგმის განსახორციელებლად და გეგმის საფუძველი არის, რომ საქართველომ არ მიიღოს კანდიდატის სტატუსი. ეს არის თქვენი გეგმის საფუძველი, რომელიც თქვენივე პირით თქვით. ამ გეგმით, თქვენ საქართველოსთვის პოზიტიურ მხარეს დგახართ? არაფრით მჯერა და რა გავაკეთო? მე ვფიქრობ, რომ საქართველო, თავისი პლუსებით და მინუსებით კანდიდატის სტატუსს იმსახურებს“,- განაცხადა მდინარაძემ.

ცნობისთვის, პარლამენტში საგარეო საქმეთა მინისტრ ილია დარჩიაშვილს ინტერპელაციის წესით უსმენენ.