გულწრფელი კითხვა მაქვს უმრავლესობასთან: ტაშს რას უკრავდით?! , - ამ სიტყვებით მიმართა "სტრატეგია აღმაშენებლის" თავმჯდომარემ, გიორგი ვაშაძემ უმრავლესობის წევრებს სხდომათა დარბაზიდან, სადაც ინტერპელაციის წესით საქართველოს ეკონომიკისა და მდგრადი განვითარების მინისტრს უსმენენ.
გიორგი ვაშაძის თქმით, სახელისუფლო პარტიის წარმომადგენლები დღეს ტაშს ზიზღის ენას უკრავდნენ, რომელიც პრემიერ-მინისტრს სხდომათა დარბაზში გამოსვლის დროს ჰქონდა.
„უმძიმესი რეალობა გვაქვს. გულწრფელი კითხვა მაქვს უმრავლესობასთან - ტაშს რას უკრავდით?! ტაშს, რომ უკრავდით იმ ზიზღის ენას, იმ რიტორიკას, რომელიც პრემიერ-მინისტრის მხრიდან იყო, მოგწონთ?! თქვენთვის ევროპელობა არის ოპონენტების კრიმინალებად დასახელება?! თქვენთვის ევროპელობა არის ზიზღის ენა და რიტორიკა?! თქვენთვის ევროპელობა არის გაუთავებელი ტყუილები, ტყუილების მოგონება, დაბრალება და ამაზე წუთების მანძილზე ლაპარაკი?! ეს არის ევროპელობა?! მართლა გგონიათ, რომ ამით თქვენ რამე კარგს აკეთებთ?!
ხშირად ისმის ხოლმე თქვენგან: ეროვნული ინტერესები, სამშობლო, ეს არის თქვენი ეროვნული ინტერესები?! მართლა მაინტერესებს რა გიხარიათ?! ეკონომიკის მინისტრია მოსული და მაგალითად გეტყვით: თუ იცით, რამდენით შემცირდა მოსახლეობის რაოდენობა გასულ წელს?! - 25 000-ით. თუ იცით რამდენი საქართველოს მოქალაქე გავიდა სარჩო-საბადებლის სანახავად ქვეყნიდან?! - 100 000-მდე. გაძვირებულია პური, ზეთი, ბოსტნეული, შაქარი, შემცირებულია სამუშაო ადგილები. იტყუებით, რომ სავალუტო ფონდმა გამოაცხადა, რომ შემდგომი 5 წლის მანძილზე ეკონომიკა ორნიშნა ციფრით გაიზრდება, წელს ორნიშნა ციფრით გაიზარდა. ვისთვის გაიზარდა?! ვინ ისარგებლა ამით?! თქვენივე ოფიციალურ ყველა სტატისტიკურ მონაცემში რატომ არის ასეთი მძიმე მდგომარეობა?! ამ ფონზე, თქვენი ქვეყნის პრემიერ-მინისტრს რა უხარია?! კობახიძეს რა უხარია?! მართლა მაინტერესებს ტაშს რას უკრავთ?!", - განაცხადა გიორგი ვაშაძემ.